Ta' barra mod ieħor...

Aħjar bloggej f'idejk milli mija fl-eteru...

2006-02-26T13:37:00.000+01:00

Jiena u ereżija ġo Pariġi.

Jiena, nigredo u san valentin ġewwa Malta.

Grupp ġdid

2006-02-19T01:20:00.000+01:00

Daqs ġimagħtejn ilu, kont fi studio biex nirrekordja dan il-proġett ġdid li tant huwa l-qalbi - kwintett ġdid ma' Yoni Zelnik (kuntrabaxx), David Georgelet (drums), David Prez (tenor sax), Olivier Zanot (alto sax).

Xi siltiet hawn taħt. Komposizzjonijiet huma tieghi:

1. Staring
2. White Russian
3. North Street

Malta Jazz Festival - Tmiem (2)

2006-02-13T00:26:00.000+01:00

1. Ok. Issa ha nqazzizha. Imma ssaportuni daqsxejn ohra, jew ibqghu mexjin. Imma dan is-suggett ghal qalbi wisq. Iktar dettalji minn wara l-kwinti dwar is-sabutagg li sar fuq il-Malta jazz festival f'kumment anonimu li thalla fuq il-blog tad-d. M'ghandix hafna xi nghid. It-twegiba tad-D kienet bizzejjed. L-N'n'G, insomma, fil-missjoni taghhom biex jehilsu l-jazz festival mill-jasar tat-telf finanzjarju, u biex jibdluh f'Montreux Jazz Festival fil-Mediterran, irnexxielhom jeqirdu l-unika wirja annwali ta' muzika jazz. The Wailers, Alan Parson's Project, Blues Brothers..... IVA, nies ha jkollkom iktar zgur, imma nerga ninsisti - tibqghux isemmugh Jazz festival.

Raġuni oħra biex ma nersaqx iktar lejn art twelidi.....

2006-02-07T15:28:00.000+01:00

Wara l-blog tad-D.

Il-jazz festival kien ifisser ħafna għalija. Ma tliftx jazz festival wieħed dawn l-aħħar ħmistax il-sena. Bdiet bħala sempliċi kurżita' fil-bidu. Ma kontx naf x'inhu jazz dak iż-żmien. Kienet kreatura stramba li kont qed nipprova nsib tarf tagħha.

U bdejt ninteressa ruħi. Bdejt nixtri d-diski. Bdejt nistudjaha din il-mużika. Billi ġewwa Malta l-unika opportunita' li nisimgħu jazz tajjeb kienet dak it-tielet weekend ta' Lulju f'Ta' Liesse, il-jazz festival kien sar importanti ħafna għalija. Fil-bidu ta' Frar kont immur inħabbat fl-uffiċju ta' l-organizzatur biex inkun naf min hu ġej Lulju li ġej.

Meta ddeċidejt li nsir mużiċist, kien minħabba l-jazz festival. Għadni niftakar l-enerġija li kien ikolli wara dak il-weekend. Dik is-sensazzjoni għadni nfittixha sa llum.

Meta daqqejt l-ewwel darba quddiem ħafna nies kelli tmintax il-sena. Kont eċitat ħafna għax kien il-palk tal-jazz festival. U dak iż-żmien kont għadni qed niskopri l-jazz. Kont intimidat ħafna li ħa ndoqq qabel Joe Lovano.

Meta ddeċidejt li nitlaq minn Malta, kien ukoll konsekwenza tal-jazz festival. Xtaqt li nkun f'post fejn stajt nitħallat ma' dawk il-mużiċisti li kont nara fuq il-palk f'Ta' Liesse. U jekk illum ninsab kuntent b'dak li għamilt dawn l-aħħar tmien snin ġewwa Franza, ma nistghax ma nirringrazzjax lill-jazz festival u lil Charles Gatt.

U meta, bil-kwartett li kelli hawnhekk ġewwa Pariġi, ġejt mistieden biex indoqq fil-Jazz Festival daqs tliet snin ilu, għalija kien unur kbir. Kien wisq iktar importanti għalija minn kull palk prestiġjuż li daqqejt fih hawnhekk Pariġi.

Meta kienu jiktbu xi ittra fuq it-Times kontra l-Jazz Festival, jien kont l-ewwel wieħed li kien jirrispondi. Kont sirt militanti ħafna dwar il-festival, għax kont veru kburi bih.

Meta kont niġi kull sajf u kont ngħallem għal xi ftit ġimgħat kont ninduna li l-jazz festival kien qanqal ħafna nteress qalb iż-żagħżagħ. Kienu ħafna li jċempluli biex jieħdu xi lezzjonijiet fil-jazz għax kienet ħakmithom dik ikl-kurżita' li kelli jien xi ħmistax il-sena ilu. U jien kont nitbissem.

U meta kont smajt bl-aħbar daqs xahrejn ilu fil-bidu kont kważi ħadtha biċ-ċajt. Imma meta saret uffiċjali, u meta rajt l-aħħar kumment li ħallewli fil-blog ta' qabel, qabadni ħafna dwejjaq.

-----------------

Il-jazz festival kien ifisser ħafna għalija.
U qed nitkellem fil-passat għax il-jazz festival M'GĦADUX.
Għax xi ħadd iddeċieda li m'aħniex qed nagħmlu biżżejjed qliegħ mil-jazz festival.
Għax xi ħadd ma fehem XEJN dwar xi tfisser kultura u edukazzjoni. U li l-edukazzjoni hija investiment. U li l-kultura m'għandha x'taqsam xejn ma' PROFITT.
Għax dak ix-xi ħadd ma fehemx li hu SUPPOST qed jgħin lill-kultura. U li l-MASSA u l-KULTURA mhux neċessarjament ikunu dejjem ħbieb.
U xogħlu HU li jqarribhom.

U ma fehemx li l-jazz ma tagħmilx qliegħ minnu.
U jekk trid tagħmel ħafna qliegħ WAQQFU mill-ewwel.

IMMA JEKK JOGĦĠBOK, jekk ħa tagħtih f'idejn xi ħadd li r-riferenzi tiegħu huma Elton John - issemihx iktar "JAZZ FESTIVAL".

------------------

Nostalġija apparti.....dal-pajjiż veru bla tama.

Daqsxej' kultura, isa....

2006-02-02T01:17:00.000+01:00

1. Kont ħlift li naġġornah regularment dal-blog. Imma hemm aħna, daqsxejn xogħol iktar mis-soltu u l-blogg spiċċa sporadiku daqs id-djalogu ġewwa film ta' Antonioni. U qed insemmi 'l dan għax il-bieraħ bqajt imqajjem sat-tlieta w nofs ta' filgħodu biex nara L'Eclisse. Kont ili ma nara film ta' Antonioni u kont qed nibża' li ħa jdejjaqni, għax inqtajt daqsxejn mill-Antonionis, Bergmans u Tarkovskis ta' żmien il-film club meta kont l-universita'. Spiċċa għoġobni ħafna. M'għandix aptit ninfexx f'xi riċensjoni reminixxenti ta' Salvu Catania, mhux stil tiegħi. Imma qisni niddentifika ruħi ma' dan iċ-ċinema, u għalkemm glaċjali u pessimist nara ħafna umaniżmu fih. U Monica Vitti mara ta' l-ustja.

2. Din l-aħħar ġimgħa kont okkupat mal-kwartett ta' Nico Gori, proġett li huwa għal qalbi ħafna. Hawn taħt hawn xi siltiet minn recording li għamilna t-tnejn li għadda, wara tliet kunċerti li veru ħassejna li morna tajjeb.

1. 1903
2. Goose

Iktar recordings ma' gruppi differenti fil-jiem li ġejjin.
Iktar siltiet fil-bloggijiet li jmiss.

Bħalissa m'għandix aptit nisma' ġazz

2006-01-10T00:07:00.000+01:00

1.QRID #145
U xi drabi dik l-għanja perennjali ta' qrid eżistenzjali terġa' tfiġġ....
Biex tfakkarni li l-ħajja m'hijiex daqshekk sempliċi wara kollox.
Biex tistaqsini jekk posti hux veru hawnhekk, f'belt li jien ma tantx niddentifika ruħi magħha, għalkemm ma nistgħax ngħid li jien imdejjaq lanqas.
Biex tfakkarni li m'għandix nissottovaluta l-klima ta' pajjiż u ma noħodhiex bi kbira jekk is-sħab griż pariġin li nilmah kull filgħodu jqabbadni l-biki.
U biex tgħidli li forsi hemm bżonn li nagħżel triq, mhux noqgħod nitbandal bejn ħajja austere ta' mużiċist li jdoqq mużika daqsxejn oskura li ma tantx tappella għal ħafna nies, u dik il-ħajja ta' xalar epikurjan ħedonist. Żewġ ħajjiet li forsi ma jmorrux id f'id xulxin, la finanzjarment lanqas fl-ideoloġija.
Jew forsi nsib kompromess ħa.

2.MUŻIKA
U bħalissa m'għandix aptit nisma' ġazz. Wara snin ta' walkmen, discmen, u issa iPod, xi 400 CD u 30Gb mp3s, widnejja qed jistaqsu għal xi ħaġa ġdida. U fil-fatt bħalissa ħlief soul, funk u brażiljan m'iniex nisma'. Issa qisni qsamt l-mużika f'żewġ familji - 1. mużika efemera, li għalkemm tkun veru tajba, ġeneralment wara ġimgħatejn smigħ frenetiku tqażżek u titfagħha fuq l-ixkaffa, tevapora fil-kontemporanjeta' tagħha. Li huwa l-każ ta' l-aħħar album ta' Uri Caine - Shelf Life (mit-titlu qishu fehem kollox is-sur Caine) -2. mużika li titraxxendi kollox, kull perjodu, kull epoka, kull trend, u li qatt ma xxebbgħak, li tikkorespondi għall-kull ħin tal-ġurnata, kull burdata. U l-lista tiegħi tinkludi 'l Thelonious Monk, Led Zeppelin, Miles Davis, Bill Evans, u hija pjuttost twila. Imma Monk u l-kumpanija bħalissa jistgħu idumu jħabtu fuq il-bieb ta' barra, għax il-playlist hija okkupata minn Sly Stone, Earth Wind and Fire , Joyce, Dori Caymmi.

3.PROĠETTI
Fl-aħħar ta' dax-xahar għandi tliet recordings bi tliet gruppi differenti. Recording ġdid tal-kwintett ġdid fjamant tiegħi b'kompożizzjonijiet ġodda. Direzzjoni ġdida pjuttost ferrieħa, "mużika ottimista xi drabi spastika" nsejħilha jien. Dal-grupp qed inżanżnu bil-mod darba kull ġimagħtejn f'dal-post jishmu les 2 singes (iż=żewġ xadini) għal min jitħajjar jiġi. Birra m'hiex għolja - 2E50 u sid il-post ġieli jitbissem. Recording ieħor mal-grupp ta' Nico Gori, jekk jirnexxielna naghmluha sa l-istudio, għax meta s-sur Gori jkun f'dawn l-akkwati ikollna nfasslu redefinizzjoni tal-kelma "ħedoniżmu". U fl-aħħar recording ieħor ta' proġett ġdid ta' mużika brażiljana strumentali, chorinho, baiao u dan-nejk, ma' rhythm section mill-ifjen. Intella' xi wħud fuq dal-blogg la jkunu lesti.

4.SOPPA MISO
Qed nipprova nirqaq. U billi naf li ebda attivita' fiżika sportiva ma tħajjarni u li jekk xi darba tarawni niġri fil-Parc ta' Buttes Chaumont jiġifieri li Norman Lowell issieħeb ma SOS Racisme u qed jishma l-Gnawa u kkonverta għall-Islam, qed nipprova niekol inqas u tajjeb. Nħobb ħafna l-ikel ġappuniż u tgħallimt nagħmel is-soppa miso.
Din hija r-riċetta. Mela xxarrab biċċa konbu (speċi ta' seaweed li r-riħa tagħha tfakkrek daqsxej fl-Msida) għal siegħa fl-ilma. Imbagħad saħħan l-ilma, qabel ma jagħli neħħi l-konbu u itfa' l-katsuo bishu (bonito flakes - li r-riħa tfakkarni vagament fl-ikel tal-ħut li kont nitma' lill-guppies li tant kienu għal qalbi meta ta' ħdax il-sena kelli aquarium). Meta l-ilma jagħli neħħi minn fuq in-nar. Ħalli kollox joqgħod. Għaddi kollox minn ġo passatur biex teħles mill-għalf tal-ħut. Issa għandek dak li jissejjaħ dashi. Taqtgħax qalbek meta tara l-kulur pjuttost marid ta' din iż-żlieġa. Erġa ibda għalli d-dashi u meta jibda jgħali itfa' ftit tofu mqatta' (it-tofu qatt ma fihmtu, imma l-konsistenza tiegħu togħġobni), neħħi minn fuq in-nar u itfa' xi erba' imgħaref miso li tkun ħallejt fi ftit mill-likwidu tas-soppa (il-miso huwa soja ffermentat). Itfa' ftit wakame' (speċi ta' seaweed imnixxef li tkun xarrabt ftit qabel). Qatta' biċċa kurrat, jef faqqiegħ, jew chives. Is-soppa lesta.

5.JOYCE
Bħalissa qed nisma' hafna 'l din. Kont naħseb li Joyce apparti kunjom ta' kittieb kbir kien biss isem ta' nisa ta' grocers ġewwa r-Rabat.

Is-sena t-tajba

2006-01-06T00:39:00.000+01:00

Kif intemmet is-sena?
Diċembru : xi punti ewlenin (ewlenin fit-trivjalita' tagħhom ukoll) -

1. Wara majjalata ostri-kaprina (gajdriet u ġobon tal-gidi) mal-gybex u Anita, li ġew iħufu fl-ilmijiet ta' Belleville, u li tant ħadna pjaċir bihom, irħejtilha lejn l-iskoll (maċ-ċetaċeju) fejn għaddejt ġimagħtejn mill-isbaħ fil-kenn ta' dar fl-għoljiet tal-mellieħa.

2. Għand is-Serkin, aka Crystal Palace, Rabat, Malta wara mixja bla bidu sens u tmiem, taħt sema ċlampu u toqol ta' arja kważi tropikali. HI quddiem té ponta zokkor ħalib tal-bott, jien quddiem kinnie sħun u erba' piżelli, u flimkien nagħmlu l-crossword ta' l-Orizzont.

3. Għawdex. Nintilfu fil-wied ta' San Blas. Qalb ħafna tajn u żlieq ninduna kemm Pariġi ħxietli r-relazzjoni tiegħi man-natura, u kemm inbati meta taħt sieqi ma jkunx hemm bankina jew tarmac.

4. Festin il-mellieħa b'tema 'vaga' ta' staff party/ikla tax-xogħol, fejn it-tema tant kienet vaga li seħibna ċ-ċetaċeju u d-dulċi meta tiegħu BISS ġew lebsin (evidenza fotografika ta' dan l-avveniment iktar tard fuq dan il-blog). Id-d kien liebes qishu teacher tal-history fil-bidu tas-snin tmenin. Il-mużika Earth, Wind and Fire, Curtis Mayfield u Sly u ħammallaġnijiet oħra simili. Xi pjaċir.

5. Foie gras kilt kemm trid hawnhekk ġewwa Franza, imma l-ewwel darba li kilt wiżżu (wiżż? ikkoreġuni ja tradutturi) kellha tkun Malta, speċifikament il-Mellieħa. Pjuttost xaħmi l-wiżż.

6. Ftira m'għand is-Sufu (Mellieħa erġajna) - bl-obligatorju té tnejn zokkor ħalib tal-bott u waħda mill-isbaħ veduti f'Malta.

7. L-isbaħ reżoluzzjoni li qatt għamilt fl-ewwel tas-sena (u HI ħajritni) - LI DAQSHEKK IĊĊELEBRAJT L-EWWEL TAS-SENA.

Jaaaaqqqq.....

2005-12-05T00:07:00.000+01:00

1. Le, m'iniex narċissist. Imma dan ir-ritratt għal qalbi. Poża aristokratika ta' markiż dekadenti arroganti wara lejla epikurjana mħanżra. Imma fuq kollox, b'dan ir-ritratt nixtieq nesprimi d-diżgust tiegħi ghax-xahar ta' Novembru. L-iktar xahar uneventful tas-sena. Għax wara li HIJA parpret 'l hemm lura fuq l-iskoll, wara dik il-ġimgħa ewforika, ħajti waqgħet f'monotonija tal-waħx. Tliet ġimgħat ta' għaks spiritwali fejn il-ġurnata kienet qed tkun interessanti daqs instuction manual ta' microwave oven.

2.Ix-xogħol dejjem jonqos f'Novembru. F'Novembru l-attivita' mużikali kienet limitata għall-gig kull nhar ta' Ħadd, lejn il-Canal St.Martin, ftit 'l bogħod minn Republique. Post ħelu fejn is-sidien huma anke' orrajt. Jekk tkunu ġejjin 'l hawn għiduli....Il-Ħadd li ġej hemmhekk, ħa nżanżan repertorju ġdid ma' kwintett ġdid (tenor sax, alto sax, kitarra, kuntrabaxx u drums). Dan il-grupp veru għall-qalbi, u issa li Novembru spiċċa, qisni inqlajt mill-letarġija apatetika li kienet ħakmitni u erġajt bdejt nikkomponi. U erġajt bdejt noħroġ....

3.Il-bieraħ wara rehearsal veru rnexxut kelli ħafna enerġija u ddeċidejt li m'iniex ħa nqatta' sibt ieħor ġewwa, nara Fawlty Towers, jew naħxi moħħi quddiem Thierry Ardisson, jew nħares lejn ir-ritratti TAGĦHA b'għajnejn nostalġiċi, jew noqgħod niġġieled mal-ħafna mistoqsijiet eżistenzzjali li jippersegwitaw il-mużiċist tal-jazz frustrat.......U ħriġt.
U wara sensiela Zubrowka qalila, whisky proletarju, inbid dubjuż, eau-de-vie tar-raspberries u birra, spiċċajt ġo disco fit-truf ta' l-Yvelines, fis-subborgi tal-punent Pariġin, b'tazza kbira gin and tonic, niżfen għall-mużika ta' ...... iva, nistħi ngħidha, ta' dawn t'hawn taħt...

Insomma kienet serata bad taste ta' livelli Buġibbeski. Imma jkollok bżonnha xi kultant. Speċi ta' katarżi wara ħafna serjeta' żejda li ġġib magħha l-arti u l-hekk msejħa kultura għolja li mdawrin bihom hawnhekk.

4. Biex inkomplu fuq nota daqsxejn ħamalla, l-għażla mużikali għall-llejla - ORLANDIVO ma' Joao Donato - funk brażiljan taż-żlieq, li matul il-griż Novembru żammli kumpanija.

Cochon

2005-11-29T00:44:00.000+01:00

Sarko, Hermeto u l-imhabba

2005-11-08T09:56:00.000+01:00

"Qed tara xi jġib il-multikulturaliżmu?"

Dan kien il-kliem ta' membru tal-familja tiegħi b'reazzjoni għall-bbqs sovversivi li bħalissa qed ilewnu l-iljieli Pariġini. U nixtieq nistieden 'l kull Malti li bħalissa bl-ikbar paranoja qed jittawwal mit-tieqa biex jara jekk il-Fiat Punto ma ġarbittx xi molotov cocktail minn ta' xi klandestin irrabbjat, biex jara sew l-affarijiet kif inhuma. Ghax nista' nimmaġina kif il-media bħalissa kapaċi jonfħu kull sentiment faxxist, speċjalment jekk isegwu l-linji ta' Le Parisien, TF1 jew M6.

Il-problema fis-subborgi hija ċirklu vizzjuż.
- Qabel ma jissieħeb ma' l-ANR, kull Malti suxxettibbli għall-xenofobja jew sentimenti ta' lemin estrem, għandu jkun jaf li n-nies li jaħarqu l-karozzi fis-subborgi huma minorita'.
- Il-ġenerazzjoni mitlufa ta' żgħażagħ tfal ta' immigranti bi kriżi t'identita' VERU teżisti.

Ix-xenarju tipiku - missierek kien jaħdem fil-fabbrika tas-Citroen wara l-gwerra, ghax il-Franza li kkolonjalizzatu kellha bżonn il-ħaddiema, u hu bahhar 'l hemm mill-Alġerija biex isib ruħu ġo pajsaġġ mimli torrijiet tal-concrete, nies ippakkjati fuq xulxin, fejn biex tmur Pariġi trid taqsam 4 egħlieqi tajn, taqbad karozza tal-linja u tistenna nofs siegħa għat-train li jmiss. Missierek għamel it-tfal. Il-fabbrika tas-Citroen għalqet. Int tikber f'ambjent 'batard' bejn l-Islam ta' missierek, il-couscous t'ommok, il-qgħad ta' madwarek, u l-Eiffel Tower li jidher il-boghod mill-15 il-sular tar-rabbit hutch li tgħix fiha. Il-ġenituri tiegħek jaħdmu bla waqfien, forsi ma tantx jagħtu kashek. Int minn dejjem tħossok stramb, għax l-unika darba li mort l-Alġerija tara lin-nanna, in-nies bdew jaghjruk li m'intx Għarbi. U meta s-sibt wara nofs in-nhar tmur sa Pariġi u tippasiġġa ħdejn Les Halles ħafna jħarsulek bl-ikrah, u meta tidħol ġo xi ħanut tad-diski, issib is-security agent idur ma' sormok. Franċiż m'intx. Tibda tintefa' ma' sħabek taħt it-torri A, l-iskola tiskartaha, tara xi daqsxejn MTV. Tinduna li faċli tagħmel il-flus billi tbiegħ xi daqsxejn ħaxixa. Imma dawk tat-torri B għandhom business sod għaddej. Int toħloq dinja tiegħek, ommok u missierek għajjenin wisq biex jieħdu ħsiebek. Id-dinja tiegħek hija t-Torri A, sħabek u l-ħolma mbiegħda li xi darba taħrab minn din il-purkerija. Id-dinja tiegħek hija wkoll dik tar-rap u l-vjolenza u l-gangs, li l-MTV tpoġġilek fuq platt kull darba li tixgħel it-televixin.

- LI XORTA MA TIĠĠUSTIFIKAX IL-FATT LI TAĦRAQ IL-KAROZZA TA' DAK LI JAQLA' L-iSMIC U LI QED IBAGHTI DAQSEK U FORSI IKTAR MINNEK.

- Tisma' l-ħin kollu b'każi ta' żagħżagħ li jgħixu f'dawn is-subborgi, li għandhom degree, imma għax ġejjin minn Aulnay-sous-Bois jew Sarcelles u għax jisimhom Rachid jew Samira, għadhom bla xogħol. Ċirklu vizzjuż. Is-subborg li tgħix fih huwa minsi. Ftit huma il-kumpaniji li ħa jinvestu hemm. Is-subborg li tgħix fih huwa stigmatizzat wisq. Xi erba idjoti jibdew jaħarqu l-karozzi. Il-media jkabbruha. Diskors is-sur Sarkozy ma jgħinx. Ikompli jipprovoka iktar. L-idjoti jkomplu jqażżuha.

Sadanittant int mhux talli m'għandekx xogħol, imma l-karozza ħarquhielek ukoll.

ISSA DAQSXEJN MUŻIKA

New Morning, it-2 ta' Novembru. Mort nara l-kbir Hermeto Pascoal, il-Django Bates Brażiljan, it-teddy bear albino Paulista. Il-grupp ta' Hermeto qishu workshop dejjem jevolvi, b'xi mumenti ta' self-indulgence tipika brażiljana, imma bi spontanjeta' li tagħmel din il-mużika ċelebrazzjoni tal-ħajja. Postcard kaotika tal-Brażil, il-bogħod mill-cliches. Kunċert li nibqa' niftakar.

FECAMP

L-imħabba did-darba żammitni 'l bogħod mit-tastiera tal-Powerbook.
(Fracchia la Belva Umana laħaq niżel kollu).
Fécamp, f'Normandy, mhux 'l bogħod minn Etretat. Hemmhekk għaddejt żmien mill-isbaħ, qalb oysters, calvados, granċijiet, bebbux tal-baħar u mara tal-ġenn.
Xi ġmiel.....

Lura

2005-10-15T12:36:00.000+02:00

Lura fuq l-eteru, wara perjodu ta' assenza sostanzjali minħabba ħafna avvenimenti li żammewni 'l bogħod mit-tastiera tal-powerbook, li għal dawn l-aħħar tliet ġimgħat sewa biss biex iniżżel ġojelli bħal L'allenatore nel pallone u Fantozzi alla riscossa. Kienu tliet ġimgħat intensi li kienu jinvolvu nuqqas kbir ta' rqad, choucroutes voraċi fis-sagħtejn u nofs ta' filgħodu, hanne (canne bit-Toskan ta' ħabibi Nico) fuq il-bankini ta' St.Germain des Pres, kebabs qattiela fiż-żernieq Pariġin, xi sakra tinten f'xi belt mitlufa fit-Tramuntana ta' Franza, u fuq kollox, kunċerti memorabbli (għallinqas, għalija) u jien pjuttost kburi bil-mużika li pproduċejna.
Kien hemm ukoll għeluq snini. Tletin sena. It-tnejn li għadda.
Wittejt it-triq għal miġja ta' dan in-numru kattiv b'sensiela ta' kriżijiet li għal tliet xhur kienu keddewni ħafna, imma issa qishom jinstabu wara dari. Insomma, iċċelebrajt dan il-jum fil-qiegħ tal-foresta Bellevilloise, ġo bar denju tal-fo-bo (grazzi Gybexi) epikurjan li jien, mal-ħbieb, hanne, pinet u pjaċir.
U qalb dan it-taqlib li ġġib magħha il-ħajja tal-fo bo, bobo jew psewdo-bohemian, għidulu li trid, xorta jkolli nitfaċċa fuq l-għatba tal-konservatorju ta' Pontault Combault b'wiċċ seren, nadif, serju lest biex insolvi l-problemi tal-kitarrist adoloxxenti tas-subborg Pariġin - (xi riff tal-Korn, xi solo ta' Satriani).
U issa qisni lest biex immur inħuf fil-bloggosfera Maltija biex nara x'ġara u fejn wasalna u nara kif jinstabu sħabi...

PS Xi ħbieb mużiċisti minn Bari għalmuni ninsulta bid-dijalett tagħhom - waħda mill-favoriti hija Kittemurt e stramalamurt nderre.
Hemm oħrajn.

Is-soundtrack għall-ħarifa

2005-09-21T00:33:00.000+02:00

Bit-tqanżiegħ irnexxieli nerġa nidħhol fir-ritmu Pariġin. It-transizzjoni kienet iebsa, ir-reabilitazzjoni kienet għajjiena, u wara tliet ġimgħat nitnikker, Pariġi qabditni minn xagħri, refgħatni mill-inertia li kont qed nistaġna fiha, farfret is-sadid tan-nostalġija tas-sajf orġjastiku u issa nistgħu ngħidu li Sandro lest biex jaffronta il-kaos urban mingħajr trawmi koroh ħafna.
Is-sajf, l-għaġin bil-cozze, il-Magnum double chocolate u l-pinet Cisk jinstabu 'l bogħod. Issa... croissants, Coteaux de Languedoc, xi kebab kattiv ta' xi kultant, cafe' decaffeinated, u tartiflette.
U bħalma kont fassalt il-kolonna sonora għas-sajf, ħsibt f'waħda li tmur id f'id mal-griż xitwi li issa mhux beħsiebu jitlaqna sa qabel Mejju:

1.QAWMIEN
Bl-ikbar indeċiżjoni, massa xagħar tirxoxta minn taħt żewġ kutri. Is-sħab Pariġin ma tantx iħajjarni. Nintikker nofs siegħa oħra. Il-qawmien iebes....
Waqt li fil-boxer shorts, quddiem il-PowerBook niċċekja jekk Fracchia la Belva Umana niżilx, bil-kikkra decaff' f'idejja, Marisa Monte għaddejja fuq wara , timlini bit-tama . Barulhinho Bom, MPB eżiliranti...

2.QAWMIEN (TIENI PARTI)
Il-qawmien jissokta għand Akli, il-bar li fih sirt naf 'l Pariġi, jew aħjar... il-backwaters ta' Pariġi. Hawnhekk niġi biex naqra Libération u sabiex nosserva l-flora u l-fauna ta' Belleville. Fil-waqt li, quddiem il-gazzetta nistaqsi lili nnifsi għala s-sidien tal-bars Pariġini huma kważi kollha Berbers u ħafna minnhom jisimhom Akli, nilmah wieħed mill-ħafna barflies li jkunu lesti li jaħlulek dik l-isbaħ siegħa bil-philosophie du comptoir ta' ġiex xelini. Viva l-iPod u min ivvintah. Infittex niġri Splay ta' Jim Black AlasNoAxis u ngħoddos rasi fil-gazzetta....

3.FUQ IL-METRO
Sejjer rehearsal. Nieħu pjaċir nosserva n-nies fuq il-metro. Qed nisma' Armistice 1918 ta' Bill Carrothers, il-pjanist kbir minn Minneapolis. Imma xi accordionist Rumen jiġi jagħmel sabotaġġ fuq widinti u jkolli ngħolli l-volum fuq l-iPod. U nieħu l-okkażjoni biex nitlob lil kull akkordjonist Rumen li jekk beħsiebu jiġi Pariġi biex jagħmel karriera fil-metro - 1. ma jdoqqux/jimmasakrawx mużika ta' Edith Piaf 2. idoqqu mużika minn pajjiżhom 3. jekk jarawni nqarras wiċċi ma jeħdux għalihom imma jien l-accordeon NOBOGHDU!!!.

4.GĦAND FRANPRIX
Il-friġġ vojta. U mmur għand Franprix ta' Belleville, li, misteru, imma kull darba li mmur jien dejjem ikun hemm ġlieda. L-ispeakers ta' Franprix jobżqu pop Franċiż abominevoli mis-snin tmenin, li suppost jinkuraġġik biex tikkonsma iktar u bi tbissima. M'iniex ħa nħalli 'l Claude François jew 'l Michel Sardou jikkontaminawli widnejja, u fuq l-iPod nagħżel 'l Djavan - Alumbramento. Kbir Djavan. U noħlom fuq Frar li ġej, meta suppost sejjer il-Brażil, fil-waqt li ntella' u nniżżel jekk nixtrix Coteaux de Languedoc jew Cotes du Rhone, jew sempliċiment Heineken...

5.ILLEJLA MHUX XOGĦOL
Nieżla x-xita. Fracchia la Belva Umana fadallu 135Mb oħra biex jinżel. Illejla mhux ħiereġ. Noqgħod ġewwa ndoqq jew nara Mean Streets għall-ħames mitt darba. Waqt li qed nħejji l-ikla ta' llejla li tikkonsisti modestament f'soppa tal-qara aħmar, f'tentattiv inutli ta' dieta wara ġimgħa tħanżir, nitfa' 'l Ornette Coleman. New York is Now, ma' Dewey Redman. U Elvin Jones huwa Alla.

6.ILLEJLA XOGĦOL
Meta nkun ħa mmur indoqq, ma jkollix aptit nisma' mużika. Jew inkella xi ħaġa li m'għandha x'taqsam xejn mal-mużika li nkun ħa ndoqq. Waqt li ninduna li ma fadalli xejn x'nilbes, u ħa jkolli nistad fil-laundry bin għall-uniformi ta' llejla, nitfa' Voodoo ta' D'Angelo. Soul funk laid back slick porn groove ....(whatever that means).

7.LURA D-DAR
Morna tajjeb. Iċ-ċetaċeju qed jonħor mill-bogħod ("bogħod" fid-dimensjonijet tal-flats Pariġini tfisser ħames metri). Sakra modesta fuqi li titfagħni f'burdata ta' nostalġija. Niftakar f'xi mħabba ta' l-imgħoddi, f'xi mħabba oħra mhux daqshekk ta' l-imgħoddi. L-inħir insistenti tad-denfil ma tantx imur ma' dan is-scenario. U għalhekk nitfa' l-headphones u noħlom ma' Bill Evans. Sunday at the Village Vanguard. Noħlom bi tbissima.

......

2005-09-11T17:09:00.000+02:00

Ir-relazzjoni li għandi mat-televixin hija pjuttost inkonstintenti. Nobogħdu, imma fl-stess ħin ġieli tgħaddi tiegħu, jirnexxielu jaħkimni, jsammarni mas-sufan, jillobotomizzani, u jitmagħni xi purkerija.... li nammetti, ġieli tinżilli għasel f'dawk il-mumenti meta l-għejja jew stati ta' letarġija avvanzata iwassluni biex nissuspetta li kull ma fadalli f'moħħi huma żewġ neurons patetiċi li meta aċċidentalment iħokku ma' xulxin inqum minn fuq is-sufan sabiex infittex birra mil-fridge...
U l-bieraħ kienet ġurnata minn dawk. Meta suppost li kont qed niffanga fid-debaucheries li joffru l-iljieli pariġini liċ-ċelibat imġewwah, spiċċajt fid-demeure tiegħi fit-truf tad-19 il-distrett nara Tout le monde en parle, forsi l-unika show fuq it-televixin Franċiż li nissaporti.

U nzerta li kien hemm Michel Houellebecq mistieden.
Il-kittieb provocateur, li rari jaċċetta li jagħmel intervisti. Jien kull ma qrajt minn tiegħu huwa Les Particules Elementaires. (Kien ikkaptivani dan il-ktieb għalkemm m'iniex akkolit tal-viżjoni pessimista u diżilluża li jipproponi fih l-awtur). Mela dan Michel Houellebecq veru jidher tifel sew. Li kieku kelli niltaqa' miegħu ġo xi bar żgur kont nixtrilu pinta. Jidher pjuttost sinċier, down to earth , b'daħka daqsxejn ċinika imma li tinspira fiduċja, u pjuttost maqtugħ mill-image u l-persona li l-media ħolqot madwaru.

Kont sorpriż ħafna. Kont qed nistenna xi ħadd veru glaċjali, u forsi xi daqsxejn arroganti. Il-kittieb diżilluż li jiddisprezza l-umanita' u li jirriduċi l-bniedem ġo sempliċi mammiferu, li jgħid li l-imħabba llum m'għadiex teżisti, nhar is-Sibt filgħaxija fuq France 2 dehrli bniedem pjuttost warm .... orrajt.
Jiena qatt ma nista' niddentifika ruħi ma' Houellebecq. Nemmen u għandi fiduċja ħafna fil-bniedem u fl-umanita'. U nħobbhom in-nies. U nemmen fl-imħabba wkoll. Minn dejjem kelli problema maċ-ċiniżmu żejjed u fil-litteratura dejjem infittex l-umaniżmu u li niddentifika ruħi b'xi mod mal-personaġġi jew il-ħsibijiet ta' l-awtur. Houellebecq nsibu cold ħafna. Ironikament, wieħed mil-awturi li nammira, Will Self, huwa cold ukoll. Imma għallinqas għandu sense of humour brillanti u niddubita jekk il-coldness kollha tiegħu hijiex tongue in cheek. (Bilħaqq, għadni kif qrajt Dr.Mukti and other tales of Woe, l-aħħar ktieb ta' Will Self, u pjuttost idiżżapuntani wara l-kbir Dorian). Xorta jibqa' l-fatt li l-idejat u l-litteratura ta' Houellebecq huma nteressanti u forsi, ha, niddejjaq nghida, intelletwalment stimulanti u probabbli ħa nispiċċa nixtrieh, Possibilité d'une Île.

(20 siegħa wara...)
U qed nipprova nfittex fejn irrid nasal b'dan il-kliem... Każ ieħor ta' navel-gazing cum masturbazzjoni intelletwali ta' nhar il-Ħadd filgħaxija? Tentattiv li naħrab it-trivjalita' tal-bloggs preċedenti? Self-consciousness fil-blogg mhux sinjal tajjeb...
Daqshekk introspezzjoni...daqshekk prise de tete....
Id-darba li jmiss naghtikom riċetta tal-canard au poivre vert..... b'ġieħ il-lightness of being.

Cimex lectularius, jien u kriżijiet oħra....

2005-09-04T22:08:00.000+02:00

1. Mument żgħir ta' introspezzjoni... navel-gazing ħa, issa li spiċċat buzzword eminenti fil-bloggosfera Maltija.
Bil-mod il-mod qed noqrob lejn it-tletin. Evalwazzjonijiet, dispjaċiri, neuroses varji u ċinturin adipose li jeħel miegħek b'ċens perpetwu, u jfakkrek li issa tard wisq biex tibda kull attivita' sportiva li ilek tippostponi ghal dawn l-aħħar għaxar snin. Forsi cliché din tat-tletin imma lili taffetwani ħafna.
Forsi xi reżonanza minn passat borgiż ta' ħajja fuq gżira fejn is-sedentariżmu iwitti triq biex ta' tletin int tkun bil-qiegħda komdu fuq kapital sostanzjali...Forsi l-passat ta' relazzjoni stabbli (li damet terz minn hajti) li jħares lejn il-preżent ċelibat bla direzzjoni....Forsi leħen il-ġenituri xi ftit diżillużi li jidwi f'moħħi b'dawk il-kelmiet li dejjem kexkxuni - "tissettilja", "tinvesti"...Forsi sempliċiment in-nuqqas ta' stabbilita' finanzjarja tal-ħajja li għażilt, u li f'dawk il-mumenti meta fil-kantuniera ta' Rue de Belleville jkolli nagħżel kebab u mhux sushi, iġġagħlni niftakar meta kont ngħallem l-Iskola tal-Mużika Belt Valletta u ċ-ċekk fl-aħħar tax-xahar.
U forsi dawn kollha ċuċati.
Ma nafx. Naf żgur li xahar ieħor (10 ta' Ottubru) beħsiebni nitħanżer u niċċelebra u nitmiegħek u niżżabel bħala umaġġ lil dawn il-kriżijiet. Festin kbir. U intom mistednin.

2. Waqt li kont qed nikkontempla biċċa Parmiggiano Reggiano enormi li ħabib tiegħi ġabli mill-italja, bdejt naħseb fuq ir-reliġjon. U kemm hija sors ta' tensjoni. U bdejt naħseb fuq dan wara li l-bieraħ rajt intervista mal-kittieb Maurice G.Dantec, li bħal Michel Houllebecq (tant għażiż għal blogger ieħor), għandu paranoia kbira fuq l-Islam. U jien li mdawwar bi ħbieb ateji, anti-klerikali f'pajjiż lajk, xi drabi nħares lejn l-għeruq kattoliċi (issa tant remoti) tiegħi u nistaqsi lili nnifsi jekk dawn humiex importanti għalija jew le. U meta nara li r-reliġjon illum iktar tifred lin-nies milli tgħaqqadhom, meta nara li minħabba xi wħud, miljuni jispiċċaw stigmatizzati, meta ninduna li qed ngħixu gwerra li jien ma rridx inkun parti minnha, ngħid lili nnifsi li r-reliġjon ħa nroddilha salib darba għal dejjem....

3. Minkejja l-ħafna OCDs ħfief li nbati bihom, u l-livell ta' ndafa domestika li għal ċelibat huwa pjuttost elevat, u minkejja saqqu ġdid, skoprejt ftit ilu, li fis-sodda tiegħi kienet qed titkattar popolazzjoni mdaqqsa ta' Cimex lectularius, punaises bil-Franċiż, u bl-Ingliż, BEDBUGS. Ma nafx minn fejn ġew. Ma nafx xi jridu minn għandi. Naf li jigdmu għal Alla.
U minħabba fihom kelli nabbanduna s-sodda tiegħi. Temporanjament, nispera. Sakemm il-Baygon mill-ahdar jagħmel l-effett tiegħu. F'burdata iktar paranoid kont forsi naħseb li l-preżenza tal-bedbugs hija xi cosmic joke fuq iċ-ċelibat, xi metafora metafiżika antipatka, bhallikieku s-sur Lectularius jixtieq jgħaddi xi kumment fuq il-vojt li hemm fis-sodda tiegħi minn xi ftit xhur ilu.....leeeeeee...lee

Re: Jazz Festival

2005-08-29T11:56:00.000+02:00

Dan huwa artiklu li deher fuq it-times.

U jien weġibtu hekk. L-ittra qatt ma ġiet ippubblikata:

I refer to Herman Grech’s article (Weekender July 23, 2005) on this year’s edition of the Jazz Festival. Mr.Grech’s callow criticisms regarding the festival’s artistic policies prompted me to write this letter.
First of all, I find it very puerile to evaluate the festival’s artistic merits on something as arbitrary and subjective as “the melodic content” of the artists’ music. Personally I find John Zorn’s music to be highly melodic, although I can understand that people who are less exposed to jazz might find it alienating. Being a jazz musician, I might have a different kind of sensibility, because I understand the mechanisms behind improvisation. Though I would gladly introduce Mr.Grech to people who are not musicians, and who are avid John Zorn fans. Mr.Grech should understand that possessing a musical baggage is not necessary to appreciate even the most inaccessible of jazz. All one needs is a bit of curiosity and enthusiasm. And in accusing jazz musicians of “self-indulgence” Mr.Grech clearly demonstrates that he is quite oblivious to what jazz is all about.
Dividing the public into the two separate factions of the musically erudite and the plebeian is a big mistake. It creates a false hierarchy, which leads to unnecessary snobbery, common amongst certain jazz circles. The only problem is that Maltese people are not exposed enough to jazz. The Malta jazz festival is the only major jazz event of the year. I have been introduced to jazz through the Malta jazz festival and others have followed suit. And I cannot but not stress the role the jazz festival has played in creating an ever-increasing interest in this art form amongst Maltese audiences.
Though I recognize the fact that there is a huge section of the audience who consider the jazz festival to be a mere social event, and Mr.Grech seems to have succumbed to this. I hold nothing against it, though it would be ridiculous to base the festival’s artistic policy on such people.
Sacrificing a festival’s integrity for a larger commercial appeal is a mistake events like the Montreux Jazz Festival have done. Let’s all hope such a thing does not happen to our own jazz festival. I found this year’s festival to be well balanced in terms of accessibility. The audiences have increased. In fact, I would even say it was one of the best jazz festivals I have attended in years.
Mr.Grech’s views exposed in his article reek of complacent philistinism and are harmful to the Maltese cultural landscape.

Sandro Zerafa,
RABAT

Reminixxenzi (1)

2005-08-21T23:40:00.000+02:00

Wara episodju qasir ġewwa l-Qawra, dik il-felula fuq sorm il-moqżieża Buġibba, fejn l-arja hija taħlita ta' dijossini li jitfewwaq il-Magħtab minn naħa u min-naħa l-oħra l-irwejjaħ infetti tal-miżibilju fish and chips u fried scampi li jaghlfu lit-turist lobotomizzat quddiem xi imitatur ta' Kenny Rogers, jien qabżitli. U mort ngħix il-Mellieħa għand ħabiba tiegħi. Kif għidt lil missieri, niġi Malta għal ħames ġimgħat, inkun irrid inħossni qiegħed Malta, mhux ġo xi public housing ġewwa Manchester. U l-Mellieħa sabiħa wisq. Rbatt qalbi ħafna ma' dan ir-raħal u mal-banda tal-każin bieb ma' bieb fejn kont noqgħod, li kull filgħaxija kienet taqbad xi arja minn xi opra, tpoġġiha fuq chopping board u timmasakraha b'mod li lanqas Django Bates ma joħlom bih. Xi ħlew. Kien sajf mill-isbaħ. Ħedonist, epikurjan, eċċessiv, imħanżer, eleganti. Is-sajf Malti m'hawnx isbaħ minnu. U issa li ninstab lura fuq il-kontinent taħt is-sħab tqil Pariġin, għandi aptit nitfa' diska sajfija ħamalla minn ta' Djavan u noqgħod inmaxtar in-nostalġija bil-kwiet.

Reminixxenzi.....

1. Tlugħ ix-xemx ġewwa l-Għadira fis-sitta w nofs ta' filgħodu. Pelegrinaġġ ta' ntossikazzjoni li beda ġewwa l-belt Valletta u kompla fuq it-triq tal-Kosta, serrep lejn il-Mellieħa b'xi waqfiet ġo bars dekadenti fejn iċ-ċappetti kienu abundanti u t-tequila ta' konsistenza dubjuża. Nispiċċa fil-bajja ta' l-Għadira. Ma nafx kif. L-isbaħ mument tal-ġurnata. Il-kuluri jidhru isbaħ mingħajr in-nuċċali, grazzi ghal moħxija għajnejja. Il-baħar ibenninini. Nogħdos u nintilef fi sħaba ta' mewġ, ċaflisa kaħlija. Il-ħemda ta' dawn il-ħinijiet tal-ġurnata kont insejt x'inhi.
Nitla' lura u ninduna li serquli l-basket bil-mobile, kartiera, nuccali u Lm60.
Ma ġara xejn....ma ġara xejn....

2. Brian Blade. 16 ta' Lulju. Malta Jazz Festival 2005. Ta' Liesse. Valletta. Meta titraxxendi kull definizzjoni ta' jazz, meta jidhirlek li quddiemek hemm xi ħaġa IKTAR milli mużiċisti tajbin ħafna, meta l-ġenerożita' u l-imħabba ta' dawn il-mużiċisti tmissek daqs il-mużika nnifisha, meta tifhem xi tfisser spiritwalita' fil-mużika wara snin ta' xettiċiżmu u biża mill-konnotazzjonijiet 'New Age' ta' din il-kelma, meta tisma' l-isbaħ ħoss li qatt smajt fuq id-drums, meta jaqbiżlek id-dmugħ u tgħid lilek innifsek li wara dan il-kunċert hemm bżonn tevaluta l-leġittimita' tiegħek bħala mużiċist....

3. Festin il-Mellieħa. L-hena tiegħi li mmur għand Connie tal-ħut, San Pawl il-Baħar, u nara x'joffru l-ibħra Maltin dik il-ġurnata. U dak in-nhar fassalt banquet ta' dimensjonijiet barokko-bakkanali - qarnit, cozze, vongole, king prawns, pagell, tonn...Nieħu pjaċir insajjar, inħawwar u nitma'. L-ikel tajjeb ċelebrazzjoni tal-ħajja.

4. Li tara f'liema stati tista' twassal lill-ħbiebek l-intossikazzjoni avvanzata. Meta l-inibizzjonijiet jaqgħu kollha f'daħna ta' għaraq, alkohol u assurdita'. Għeżież ħuti, dan huwa l-colocataire tieghi, is-Sur Degabriele, id-D, aka Golfinho, aka iċ-ċetaċeju, f'dawk il-mumenti meta ma jkunx qed imelles il-kuntrabaxx b'ħarsa solenni, f'dawk il-mumenti meta ma jkunx qed ikemmex moħħu quddiem l-iBook. Mela l-aħwa, accrochez-vous bien....

U għandi iktar minnhom dawn.....

Il-kultura tad-dwejjaq

2005-07-13T10:48:00.000+02:00

Ftit ilu sibt ktejjeb ċkejken, relikwa minn tfuliti, il-bużnannu tal-blogg preżenti. Kelli relazzjoni pjuttost inkonsistenti ma' dan il-ġurnal. U meta nqalleb f'dawk il-paġni ta' angst, tgergir ġenerali u filosofija eżistenzjali à deux balles tad-dilettanti, nistaqsi lili nnifsi: imma jien veru kont imdejjaq?
F'dawk is-snin meta l-weekend idejali kien jibda Tal-Qroqq fil-Film Club, b'xi film ta' Tarkovski jew xi Ken Loach, fejn iktar ma kien ikun bleak iktar kien jinżilli għasel. Meta Sartre, Bukowski, Camus u Kafka kienu jżommuli kumpanija fuq tal-linja jien u sejjer lura lejn id-dar. Meta l-griż kien kulur favorit u meta kont naħseb li jekk immiss il-qiegħ ħa nifhem kollox dwar il-ħajja.
Illum xorta għadni nħobb 'l Tarkovski, Antonioni u Loach, forsi għal raġunijiet oħra . Ma nafx għala dak iż-żmien kont nassoċja d-dwejjaq mal-kreazzjoni artistika. Forsi kienet xi forma ta' ribelljoni kontra d-deżert kulturali Malti u kontra l-massa, u xtaqt inkun marġinali (hekk u hekk għażla ma kellix). Imma veru kont imdejjaq? Le. Ikolli ngħid li dak iż-żmien tant kont nigglorifika d-dwejjaq u d-dekadenza li "xtaqt" inkun imdejjaq, imma ma stajtx. Għax l-ambjent borgiż li tlajt fih qatt ma ċaħħadni minn xejn. U ma kellix għalxiex inkun imdejjaq, apparti mill-frustrazzjonijiet li jista' jiltaqa' magħhom l-elit liberali/krepuskolari/normali/ġenerali li jgħix fiċ-Chernobyl kulturali Malti.
Xi daqqiet naħseb li l-kult tad-dwejjaq u l-viżjoni romantika ta' l-artist huma idejat kattoliċi. Li fil-mentalita' tal-Punent it-tbatija hija neċessarja biex tilħaq kull għan. Ir-riżultat hu li mbagħad xi ħaġa ferrieħa u ħafifa ma taqax taħt il-kriterji ta' arti.

Illum naf żgur, per eżempju, li huwa ħafna iktar diffiċli tikkreja xi ħaġa ferrieħa/uplifting, milli xi ħaġa tad-dwejjaq.

B'dan il-ħsieb ħa nagħlaq dan l-ewwel staġun tal-bloggs.
Għada filgħodu lura lejn Malta. 5 ġimgħat ta' eċċess.
Ha nkun nghix il-Qawra, dak l-ispeċi ta' annex ikrah ta' Buġibba.
U x'hemm agħar minn Buġibba jekk mhux subborg ta' Buġibba?
Problema hi li ma nafx jekk ħa jkollix internet fil-flat, u sinċerament li mmur nibbloggja mis-Suncrest jew xi Qawra Tourist Complex ma tantx tispirani.

Nirringrazzja lil Toni, Kurt, Mark, Mario, D, Sharon, Alex, Twanny, Noel u Bertu li kuljum qrajt il-bloggs tagħhom, u oħrajn ovvjament.
Daqxejn pubblicita':
Jekk ma jkollkomx x'taghmlu kull nhar ta' Hamis filghaxija (inkluż illejla, l-14 ta' Awissu), aqbzu sal-Veċċja, San Pawl il-Baħar.
Inkun qed indoqq mas-City, D u Joe.
Għaddu. Għaddu.
Nixorbu tazza Rioja flimkien.
Jew tnejn.

Is-subborgi u l-effett soporifiku tagħhom

2005-07-06T00:45:00.000+02:00

1. Is-Sibt li għadda kont qed indoqq ġewwa Mantes-la-Jolie, subborg li jinstab xi 60 kilometru 'l bogħod minn Pariġi. Ġeneralment, li tlissen biss l-isem ta' din il-belt huwa biżżejjed biex tipprovoka t-tikmix fuq moħħ il-borgiż franċiż u tevoka xbiegħat ta' karozzi jinħarqu u pitbulls u l-fantażmi/cliches kollha l-oħra tas-subborgja delinkwenti. Fil-mitoloġija urbana Pariġina, din il-belt, hija l-istandard-bearer tal-kriminalita' u d-dekadenza. Dan kollu grazzi għal gazzetti bħal Le Parisien u stazzjonijiet bħal M6 li xi ftit snin ilu għinu biex joħolqu psikożi ta' l-insigurta' fost il-Franċiżi, f'sensiela ta' episodji fuq il-gang wars bejn dawk ta' Val Fourre' u dawk ta' Les Mureaux (iż-żewġ housing projects prinċipali ta' dan is-subborg). U mbagħad jistagħġbu kif xi bidwi fit-toqba tas-sorm ta' l-Auvergne li qatt ma ra Għarbi jew immigrant f'ħajtu jivvota lil Le Pen...
U veru kont sorpriż meta wasalt fiċ-ċentru ta' din il-belt u rajt li kienet belt pjuttost sabiħa. Katidrali, bini sabiħ, toroq ħelwin u l-karatteristiċi kollha ta' belt provinċjali Franċiża. Ma kienx hemm taħżiż fuq il-ħitan, ma kienx hemm homeys, ma kienx hemm dustbins jinħarqu. Ovvjament nimmaġina li kont il-bogħod minn dawk l-inħawi li kienu tant stigmatizzati mill-media Franċiża. Insomma, bdejna ndoqqu. Dak in-nhar ma kontx qed indoqq il-kitarra, imma l-guongue fi grupp ta' maracatu. Konna qed indoqqu fit-toroq fiċ-ċentru ta' din il-belt. Issa, issoltu din il-mużika tqajjem lin-nies, kulħadd jintefa' jiżfen jew jitħarrek b'mod erratiku. Imma ġewwa Mantes-la-Jolie, le. L-indifferenza li ltqajna magħha kienet eżasperanti. In-nies, il-ftit nies li kien hemm, dehru passivi, blasé, apatetiċi, għajjenin u l-entużjażmu tagħhom kien daqs dak ta' lampshade. U m'hemm xejn agħar minn dan għall-mużiċist. Tibda tħossok inutli u kull nota li toħroġ mill-istrument taħbat ma' ħajt tal-konkos u tispiċċa mgħaffġa ma' l-art bħal frotta mħassra.
X'inhi l-problema ta' dawn in-nies? Jibżgħu joħorġu minħabba l-ispettru tal-insigurta' li jirrenja fuq din il-belt? Għala hekk kif toħroġ daqsxejn 'l barra minn Pariġi, l-affarijiet huma daqshekk differenti? Dawn huma kwalitajiet intrinsiċi ta' subborg?

2. Pontault Combault. Tinqara Ponto' Kombo'. Kull nhar ta' Tlieta mmur ngħallem fil-konservatorju ta' Pontault Combault. Nofs siegħa 'l hinn fl-Ilvant ta' Pariġi bl'RER E. Ġewwa Pontault Combault m'hemmx delinkwenza. M'hemmx gang fights. Subborg residenzjali. U biex nikkwota lili nnifsi minn blogg preċedenti, għax ma sibtx paragun aħjar, il-livell t'attivita' ġo dan is-subborg huwa komparabbli ma' dak tan-Nadur il-Ħadd wara nofs in-nhar f'Awissu. Dormitorju tal-petit bourgeois, popolazzjoni lobotomizzata fuq is-sufan quddiem it-televixin. Tal-ħobż hemm wieħed, wieħed tal-laħam, u cafe' wieħed fejn jintefgħu karattri barfly-types li ma tantx jispirawk biex ikollok konversazzjoni maghhom, b'ħarsa blank fuq wiċċhom, mitluqa fuq tazza birra fietla jew xi flipper jew xi gazzetta lokali fejn il-headlines ikunu jitrattaw fuq l-inawgurazzjoni ta' xi gymnasium. Kemm jien allerġiku għal dawn il-postijiet. Kemm jien allerġiku ghas-sedentariżmu, madunna...

3. F'episodju ieħor mill-ħajja tal-jazzist Rabti...Dak in-nhar li wasalt lura minn New York, daqs xahrejn ilu, b'jetlag jinten fuqi, u għajja kerha wara li kont mgħaffeġ matul 7 siegħat fuq ajruplan minn waħda ħoxna minn Illinois ma' ġenbi li ddecidiet li jien kelli npatti għall-miljun BigMacs li kielet matul ħajjitha u kelli nġarrab bilfors l-obesita' tagħha, u b'hekk spiċċajt ma rqadtx sekonda...dak in-nhar insomma kelli gig ġewwa villaġġ x'imkien lejn Beauvais mhux il-boghod hafna minn Pariġi. Villaġġ ta' xi 300 persuna li ma jikkwalifikax bħala subborg. Subborg ta' mkien. Mitluf fil-limbu tal-backwaters tat-tramuntana ta' Franza. Villaġġ pjuttost ħelu - fjuri, knejjes u x'naf jien.
Bqajt mbellaħ bl-ammont ta' alkoholiċi li kien hemm.
U kull persuna li kellimt kellha l-kondotta mtebbgħa.
Nies bored u morda minn defiċjenza qawwija ta' distrazzjonijiet.
Kulħadd kien qishu jaf 'l kulħadd. Kien hemm arja pjuttost sordid f'dan il-villaġġ mimli fjuri. Id-dekadenza li ħassejt kienet taqta' ħafna mad-dehra idillika ta' dan il-post. Hassejtni qisni go xi film ta' Larry Clark.

U għadni kif iddeċcidejt li togħla kemm togħla l-kera jien mhux ħa noħroġ 'l barra minn Pariġi. Nirrifjuta li nġarrab il-lobotomija tas-subborg.
Nippreferi ngħix Buġibba kważi kważi.
Mhux bin-nejk.

P.S. Ghalkemm hemm subborgi nteressanti fil-viċin ta' Pariġi. Eċċezzjonijiet. Bħal Montreuil, u Pre St.Gervais.

Il-Brażil, is-sajf u l-ħxuna

2005-06-29T01:52:00.000+02:00

1. Dalgħodu d-denfil baħħar 'l hinn. Iċ-ċetaċeju u l-kuntrabaxx tiegħu temmew l-ewwel kapitlu fl-avventura urbana tal- mużikant (biex nuża kelma favorita mill-lessiku ta' l-entertainment scene Maltija) Malti eks-patrijat. Nispera li das-sajf xtutna jgawdu mill-għanja ħelwa ta' l-isturment (ġawhra oħra mil-kalepin tal-vokabularju mużikali melitensis) mdaqqas taċ-ċetaċeju. Jien fadalli 3 ġimgħat oħra hawnhekk nitħabat mat-temp umduż skifuż skiżofreniku pariġin. (Iddeċidejt li s-sħana m'hijiex kompatibbli ma' din il-belt). Fadalli xi gig 'l hawn u 'l hinn, xi majjalata mal-ħbieb (bħala preludju għall-mitt bbq li qed jistennewni das-sajf fuq il-blata) u proġett ta' grupp ġdid li ħa jkun sequel taż-Zerafa-Georgelet 4tet (li kellu karriera erratika mmens, li qisha ntemmet b'mod metaforiku l-ġimgħa l-oħra waqt il-Jazz Festival ta' Orleans fejn konna qed indoqqu, meta buffura riħ u maltempata mill-eħrex svujtjat post wara għoxrin minuta daqq...waqt solo mill-ifjen ta' trumbun slajs (Maltese musicians' popular argot for slide trombone...kbira din...).

2. Is-sur Vella Gera għandu raġun. Hemm bżonn dieta. Is-sibt li għadda qabel gig mal-batucada (għal min ma jafx batucada hija grupp ta' perkussjoni brażiljana, u għal min ma jafx, is-sur Zerafa huwa wkoll perkussjonist part-time, u t-tisbit fuq xi alfaia, xi agogo jew xi pandeiro apparti milli huwa terapewtiku għalih, huwa wkoll l-unika attivita' fiżika li s-sur Z jagħmel barra li jitbaxxa biex joħroġ il-kitarra minn taħt is-sodda jew iqatta' xi tewma) kont fi dressing room ma' erba' capoeiristas brażiljani li xi drabi jaħdmu magħna, u nsomma meta dawn neħħew it-t shirts, ħassejtni wisq intimidat mill-muskoli ta' dawn l-atleti u stennejt daqxejn li jitilqu 'l hemm qabel ma nneħħi t-t shirt tiegħi. U nikxef dik il-massa amorfuża ta' adipose bla proporzjon ta' xejn. Kull darba li joqrob is-sajf dejjem infassal strateġiji ta' dieti bla bidu u bla suċċess. Naf li din id-darba l-istess ħaġa ħa tiġri. Is-soluzzjoni probabbli tinsab fil-ħwejjeġ - xi qmis skura XXL li tgħatti ż-żaqq b'mod diskret....

3. Jannar li ġej sejjer il-Brażil. Żgur. L-ghażla kienet bejn xi ftit xhur New York ngħix ħajja austere (i suffer for my art) ta' mużiċist mejjet bil-ġuħ, jew naħraq kull ma fadalli fil-kont u mmur il-Brażil. Ili żmien twil nhewden bil-madonna Brażil. U issa hemm bżonn immur. Nixtieq immur Salvador de Bahia, Olinda, Sao Paolo u dawn il-postijiet kollha li ili noħlom bihom. New York ha jkolla tistenna. Ghandi bżonn culture shock żgħir u naqta' daqsxejn mill-Ewropa...Mela għada għand il-Fnac nixtri xi CD-ROM Teach Yourself Portugese....

2005-06-23T23:29:00.000+02:00

Filli tkun qed iddoqq ġo xi bar skwallidu miżgħud b'uċuh lewn in-nikotina fejn l-apatija u l-inertia jkunu laħqu metastażi u jeħlu miegħek daqs lega għaraq fl-eqqel ta' Settembru u inti biex ma titgħallaqx bil-kordi tal-kitarra tipprova tikkonvinċi lilek innifsek li dan huwa scenario adattat għall-mużika li qed tagħmel. Kwadru ta' Hopper bi script ta' Bukowski. U toħroġ minn hemm bi ħmistax il-euro u l-metro jkun spiċċa u tonfoqhom taxi.

Filli ssib ruħek ġo xi kamra ta' hotel tleqq, fis-seba' w għoxrin sular, fejn kważi kważi tistħi tuża l-kamra tal-banju, u l-irtubija tas-sodda tgħannqek u tiżgħel bik bi tjubija maternali. Dan kollu biex iddoqq xi nofs siegħa quddiem folla ġlekkijiet, Dom Perignon, foie gras u Chanel, u taqla' biżżejjed flus biex tħallas il-kera, il-kont tad-dawl, dak tat-telephone, u jifdallek biżżejjed għal flixkun Laphroaig u darbtejn sushi.

Filli ssib ruħek ġo xi sala ċkejkna mimlija pariġini kolti eruditi fejn l-apprezzament iktar jidher fuq it-tikmix madwar ix-xuftejn milli fiċ-ċapċip. Fejn tħossok rispettat, ismhek fuq xi poster, u tmur lura d-dar b'sodisfazzjon li għalkemm efemeru, jgħinek torqod tajjeb mingħajr ma jkollok bżonn tikteb xi blog bħal dak preċedenti. U tinsa kemm tkun tħallast għax mhux importanti..

Għalija dawn il-kuntrasti huma l-isbaħ ħaġa li hemm fil-ħajja ta' mużiċist, u ma nara l-ebda ġerarkija f'dawn is-sitwazzjonijiet. Kull waħda hija neċessarja għalija. Skiżofrenija li tgħinek iżżomm saqajk ma' l-art u drabi oħra tgħollik mas-sema.

L-għażla mużikali għall-llejla, Courage ta' Milton Nascimento mill-1968, li skond id-d mimli Scott Walkerisms.
(Dan l-aħħar ħsibt li qatt ma smajt ħaġa ħażina minn dak li sar bejn l-1965 u l-1969, f'kull stil)

It-talibani tal-bebop (2)

2005-06-19T01:01:00.000+02:00

Il-mistoqsija nkejjuża li baqgħet tippersegwitani minn mindu bdejt indoqq il-jazz: Għal min qed indoqqha dil-mużika? Misantropu m'iniex, għalkemm xi kultant nistħajjilni qed indoqq mużika tal-misantropi. Drabi oħra, jidhirli li dawk kollha li jinstabu quddiemi bi tbissima ta' empatija falza, li nefqu 20 euros biex jiġu jismgħuni, u li ħallsu 6 euros ta' birra patetika, qegħdin hemm sempliċiment għax il-jazz x'imkien xi ħadd iddeċieda li huwa fenomenu ta' moda. U li tmur ġo jazz club, għall-borgiż, hija ritwal obligatorju u neċessarju, l-istess bħal ma tmur tara exhibition. Drabi oħra nkun qed indoqq ġewwa xi toqba fl-20 distrett, fejn il-birra tiswa 2 euros, fejn il-pubbliku huwa xellugi bohemiborgiż żagħżugħ, u jidhirli li ħadd m'hu qed jisma', kulħadd jgħajjat u l-kitarra tiġġieled kontra l-istorbju. Dak il-ħin ikolli aptit ninbidel ġo xi Thurston Moore u nbiċċrilhom widnejhom bil-feedback.
Paranoia, jew mhux qed jirnexxili niddentifika ruħi mall-pubbliku tiegħi?
Meta kont iżgħar il-fatt li l-jazz kien underground u mużika tal-minorita' kien jogħġobni. Dak iż-żmien kont ngħix Malta. Konna forsi għaxra nisimgħu il-jazz. Kont kważi naraha bħala mużika trasgressiva. Li kienet xi darba.

Imma m'għadiex.

Illum ngħix ġewwa pajjiż miżgħud bil-jazz festivals, fejn il-jazz jinstab fuq il-pedestall mqaddes tal-kultura sussidjata, 'l bogħod mis-siringi ta' 52nd Street fis-snin erbgħin.
Li hija ħaġa tajba wara kollox. Li l-kultura tkun sussidjata. Jien li Malti żgur mhux ħa ngerger fuq din.
Imma qisni m'iniex sodisfatt.
Għala l-'free jazz' per eżempju, li xi darba kienet mużika ta' protesta assoċjata ma' l-idejat tal-Black Power tas-snin sittin, illum spiċċat xi ħaġa elitista u ċerebrali u art farty? Speċjalment fl-Ewropa.
Għala l-'bebop', li fil-bidu kien xi ħaġa rivoluzjonarja u modernista, illum spiċċa 'codified' u użat bħala arma mill-ayatollahs puristi nostalġiċi kontra kull forma ta' moderniżmu? Speċjalment fl-Ewropa.
Xi drabi naħseb li l-artist ġewwa l-Ewropa jinstab komdu.
Il-kultura poġġejniha fuq pedestall.
L-arti sagra wisq.
Il-borgiż jirbaħ.
Meta mort New York, apparti li kissirt ħafna mitoloġiji dwar din il-Belt meqjusa minn ħafna bħala l-Mecca tal-jazz, rajt li hemmhekk il-mużiċisti inqas komdi, jaqalgħu inqas flus, sussidji ftit li xejn, imma hemm iktar dinamika u r-referenzi hemm qeghdin.
Ma rridx naqa' fil-cliche' li t-tbatija hija neċessarja għall-artist, imma naħseb li fl-Ewropa xi drabi tant l-arti għamilnieha sagra, lill-artist tant tajnieh kumdita', li l-arti qtilnieha u spiċċat aseptise'.

Issa isimgħu dan....

Is-SOUNDTRACK ghas-Sajf

2005-06-14T23:45:00.000+02:00

Naqbel li hija ħaġa ta' l-għaġeb li daż-żmenijiet, hekk kif jibda joqrob is-sajf, l-eks-patrijat taħkmu n-nostalġija tal-blata. Għatx kbir ghal dik il-letarġija li twaħħlek fuq xi siġġu quddiem xi fan, bil-ħsejjes tal-murtali jidwu wara darek u n-nemus jiżfen taħt it-toqol ta' l-umdita' sajfija, jew xi platt ghagin bil-cozze ghand is-Sicilia fil-berah u birra kiesħa quddiemek li trid tħaffef u tixrobha qabel ma ssir fietla. Biex inħejji għall-miġja tiegħi fuq il-blata l-14 ta' lulju, fassalt kolonna sonora gużtuża għal ġurnata tipika sajfija:

1.QAWMIEN
Ġeneralment inqum bi ħruq fl-istonku.
Kor ta' ulċeri, b'kuntrapunt mill-ifjen, jgħannu innu b'ġieh lis-Serkin, il-pastizzi, il-lager u l-'junk food' Malti kollu li l-lejl ta' qabel tfajt fil-miżbla gastrika ta' l-istonku tiegħi. Panik kbir hekk kif min ġos-sodda idi tfittex il-kaxxa Zantac u ma ssibiex. Biex intaffi il-ħruq, nitfa' l-ewwel silta minn Club da Esquinha ta' MILTON NASCIMENTO. Mużika b'tama u mhux fitta żżejjed għal filgħodu...

2.FUQ TAL-LINJA LEJN IL-BELT
Xi ħaġa b'ritmu għajjien mqanżah, li fl-istess ħin ma tridx tkun kwieta żżejjed minħabba l-ħoss tal-magna insistenti. Nagħżel Quem e Quem ta' JOAO DONATO, funk brażiljan mis-snin sebgħin li jharikklek il-kirxa, li jevoka xi film erotiku minn tfuliti mill-Italia 7 fil-11 ta' filghaxija.

3.GEWWA L-BELT VALLETTA
Nħobbha wisq il-Belt. L-isbah belt fid-dinja. Ghadni ma ltqajt ma' hadd, imma mil-boghod nilmah xi wcuh minn dawk l-irkejjen tal-passat tieghi li nippreferi ninsa.
Dawk in-nies li zgur l-ewwel haga li ha jsaqsuni hi jekk "spiccajtx il-kors" u "meta gej lura Malta" u "jekk izewwigtx". Mur ghidilhom li waqaft nistudja erba' snin ilu, qatt ma hrigt minn Malta bil-hsieb li nerga' nigi lura u li ergajt spiccajt ghazeb ghat-tieni darba fi spazju ta' 10 xhur. U dawn il-mistoqsijiet jistaqsuhomli kull sajf. Nghoddos rasi 'l isfel u fuq l-iPod infittex nigri Freak In ta' DAVE DOUGLAS. Nikkanalizza r-rabja u l-istinti omicidi kollha fil-kitarra ta' Marc Ribot.

4.FUQ TRIQTI LEJN IL-BAHAR
Fil-karozza tac-cetaceju jew ta' Mikiel jew ta' xi ruh ohra li ha tissaportini das-sajf. Idi barra mit-tieqa, tbissima fuq wicci, riha ta' coconut oil jew xi atrocita' ohra, nohlom fuq il-magnum mega double chocolate bonanza li ha nilghaq fuq ir-ramel, u l-kbir DJAVAN ghaddej fuq wara. A Voz e o Violao, mis-snin sebghin. Muzika ferrieha, muzika ewforika, u ghal dawk kollha li jahsbu li l-muzika latina tfisser tisma 'l Ricky Martin b'Margerita f'idejk il-Fuego, isimghu daqxejn 'l dan....

5.JEW INKELLA SIESTA
Tahlita ta' apatija, letargija u l-qarnit li qaghdli fuq l-istonku, u bqajt id-dar.
Sodda. Fan. U Bill Evans. The Paris Concert. Li ha jbenninni sakemm nibda nohlom bil-bbq tas-sibt li gej jew is-sajda ta' ghada filghodu... Sargu kbir iqajjimni u d-drums ta' Joe La Barbera itellifli r-raqda. Nitfi l-istereo u nkompli ghaddej sas-sitta.

6.SUPPOST QED NAGHMEL XI HAGA UTLI
Ili hmistax il-sena nghid lili nnifsi li r-raqda ta' wara nofs in-nhar m'ghandiex tkun itwal minn siegha. Issa ghandi hedla kbira li ma titlaqniex malajr. Rqadt wisq. Hlejt il-hin. Ahjar ntfajt nistudja l-kitarra. Nitfa' Dust ta' BEN MONDER, skond jien l-ikbar kitarrist fid-dinja bhalissa, biex nispira ruhi u forsi nimmotiva ruhi. Naqbad il-kitarra u wara nofs siegha ndoqq l-gharaq jibda' niezel. Wara kollox qatt ma jien ha nsir tajjeb daqs Ben Monder. Mela.... might as well, mmur fuq it-terazzin, nlegleg il-lager....

7.BARRA MIX-SHOWER LEST BIEX NIFFACCJA IL-GAWHAR TA' L-ILJIELI MALTIJA
Quddiem il-mera ninduna li ahjar nohodha easy bil-pastizzi u l-lager. U sa ftit gimghat ilu kont qed niekol il-quinoa u s-sashimi u nixrob il-lapsong souchong. 4 gimghat Malta, 10 kilos. Illejla ha ndoqq il-Veccja, mad-D, is-City u Joe. Fuq wara Galos De Briga ta' JOAO BOSCO. Ma nafx ghala ghandi aptit noqghod naqbez fuq is-sodda.

8.LURA D-DAR
Mimdud fuq is-sodda.
Il-qniepen, in-nemus, is-serduq u d-dawl tal-qamar.
Parigi tidher 'l boghod wisq. Ghada forsi mmur sas-suq ta' Marsaxlokk. Nixtri xi qarnita u noqghod nsajjarha bil-kwiet. U xi nofs tuzzana pagell. Naghmlu ikla mal-hbieb. Jew ncempel lis-City naghmlu ikla bebbux...Dak jinqala' biex isajru l-bebbux. Tliet flixkien Rioja...
Ghajnejja tmur bija mal-muzika krepuskulari ta' LARRY GOLDINGS.
Nohlom fuq zmien meta nkun nista' nqatta' iktar minn tliet gimghat fuq din il-blata minghajr ma' jahkmuni frustrazzjonijiet kbar. Forsi xi darba ghad jigi...

Għarab....

2005-06-11T19:40:00.000+02:00

Qed niftakar l-ewwel darba li kont mistieden niekol couscous għand Samira (mara ta' ħabib tieghi), u kemm kont identifikajt ruħi ma' din il-magrebina iktar milli mal-ħbieb kollha l-oħra Franċiżi li kelli dak iż-żmien. Fil-ġesti tagħha, fil-mod kif tmissek meta tkun trid tgħidlek xi ħaġa, fin-nuqqas ta' riti u kodiċi ta' politezza li dejjem rajthom mhux neċessarja, fin-nuqqas ta' ċerebraliżmu żejjed fl-argumenti tagħha. Dan kien ftit wara l-miġja tiegħi fuq il-kontinent.
Kont qed ngħix Lyon, tempju tal-borgeżija glaċjali kattolika Franċiża, u kapitali ta' l-ikel.

Qed niftakar ukoll fil-proprjetarju tal-flat fejn konna noqogħdu dak iż-żmien jien u l-ex, probabbli l-ikbar cliché karikaturali ta' borgiż li qatt rajt, b'żewġ 'garden gnomes' fil-ġardina tiegħu u salott kulur 'peach' (mmur lura fuq kliemi, din il-vulgarita' kitsch kollha kienet tikkwalifikah iktar bħala beauf milli borgiż). Insomma, dan darba kien qed jirrakontalna fuq it-tifla tiegħu, u kif kienu għamlu għaliha xi 'immigranti'. U mbagħad ħares lejna, u bl-ikbar eleganza qalilna li aħna differenti, 'immigranti' differenti minn dawk li attakkaw it-tifla tiegħu. (Xi ftit xhur qabel dan l-iblah t'Alla kien staqsieni jekk Malta hemmx ħafna 'idiots de village'; għax kien jidhirlu li f'pajjiż daqshekk żgħir u bil-ħafna konsangwinita' u inċesti varji li jġib miegħu dan iċ-ċokon, suppost hemm 'freak' f'kull kantuniera.)

Dak iż-żmien ma kontx naf ħafna fuq it-tensjonijet razzjali fi Franza, fuq Le Pen, fuq l-istorja twila ta' l-imigrazzjoni fi Franza, apparti minn 'La Haine' ta' Kassovitz . Ovvjament bħala Malti, l-ostilita' lejn l-Għarab ma kenitx xi ħaġa ġdida għalija. Imma billi missieri kien jgħallem l-Għarbi u kelli daqsxejn kuntatt ma' dawn in-nies, minn mindu kont żgħir minn dejjem kont naħsibha darbtejn qabel ma nemmen l-għajdut ta' "z-ziju kera flat lil-familja Għarbija u mesħu sormhom mal-purtieri u l-ħajt..."

Lyon hija belt Franċiża daqs kemm Marseille hija Għarbija. Ġewwa l-belt ma tantx issib kwartieri "popolari" u ta' immigranti. U hemm ċerta tensjoni bejn il-belt u s-subborgi tagħha. Subborgi bħal Venissieux, Vaux en Velin, li f'għajnejn ħafna Franċiżi simboli tad-delinkwenza u l-kriminalita' li ġġib magħha l-imigrazzjoni. F'għajnejja huma pjuttost simboli ta' urbaniżmu moħxi tas-snin sebgħin, u ta' kemm l-integrazzjoni kienet falliment f'ċertu bliet Franċiżi.

Pariġi mod ieħor. Għalkemm miżgħuda wkoll b'subborgi ta' dan it-tip, ġewwa l-belt l-istorja differenti. Meta wasalt Belleville sibt kwartier fejn Lhud Sefaradi Tuneżini jgħixu spalla ma' spalla ma' Magrebini, Afrikani maċ-Ċiniżi, Portugiżi mal-Franċiżi. Eżempju perfett ta' integrazzjoni? Ma nafx, imma fl-opinjoni tiegħi huwa wieħed mill-isbaħ inħawi f'Pariġi. Li huwa xhud tad-diversita' kulturali li ssib f'dan il-pajjiż.

U d-diversita' hija waħda mill-isbaħ affarijiet li tista' ssib ġo belt u ġo pajjiż. L-isbah affarijiet fid-dinja naħseb li ħarġu minn dak li hawn issejħulu 'metissage'. Fi kliem ieħor, taħlit, ta' demm, ta' popli, melting pot. U jaqbadni swied ta' qalb meta nara li issa li ġewwa Malta qed naraw erba' uċuh suwed "itebbgħu" il-pajsaġġ ileqq tal-bjudija kattolika tagħna, xenophobia kbira qed tahkimna. Wara kollox, nahseb li l-poplu Malti huwa wieħed mill-isbaħ eżempji ta' 'metissage' u minn dejjem rajt kuntradizzjoni kbira ġo Malti razzist.

It-talibani tal-bebop

2005-06-07T11:42:00.000+02:00

Nixtieq niddisoċja ruħi minn dawk li jien insejħilhom it-talibani/l-ayatollahs tal-jazz.

Fi kliem ieħor, il-puristi, li b'ġerarkija mużikali falza jpoġġu l-jazz fil-quċċata.
Dawk li jaħsbu li wara Charlie Parker jew Coltrane ma ġara xejn ta' sustanza.
Dawk li minħabba fihom, il-jazz spiċċa marġinalizzat u assoċjat ma' ċerta klassi elitista li teskludi kull "plebeju" mużikalment illiterat.
Dawk li minħabba fihom, kull darba li niftaħ ħalqi u nitkellem fuq il-jazz ma' xi ħadd iħossni qisni qed niddefendi xi ħaġa.
Dawk li jirrifjutaw kull influwenza esterna li tista' ttebba' il-pilastri tal-bebop.
Dawk li ma ndunawx li mużiċisti kbar bħal John Coltrane u Miles Davis li għinu biex il-jazz mexa 'l quddiem, kienu l-iktar nies li kellhom moħħhom miftuħ.
Dawk li minħabba fihom, il-jazz ħa r-riskju li jispiċċa sempliċiment artefatt jiġbor it-trab tan-nostalġija tas-snin erbgħin u ħamsin.

'Mn Alla hawn il-Bad Plus, jim black, brad mehldau, u ħafna oħra bħalhom li jfakkruna li fl-aħħar mill-aħħar il-jazz hija mużika li hija parti mill-istess għadira ta' kontemporanjita' li tinkludi kull mużika oħra tas-sekli għoxrin/wieħed u għoxrin, u hija ukoll mużika li hija miftuħa għal kull influwenza. Nieħu pjaċir meta gruppi bhal The Bad Plus jagħmlu 'covers' ta' l-Aphex Twin, Dave Douglas jagħmel umaġġ 'l Bjork f'The Infinite, Brad Mehldau idoqq Radiohead, b'lingwaġġ li jibqa' dejjem 'jazz' imma li mhuwiex imkaħħal fi klassiċiżmu nostalġiku.

Nuqqas ta' rqad

2005-06-06T01:26:00.000+02:00

Bħalissa s-siegħa w nofs ta' filgħodu. Flixkun Coteaux de Languedoc jiżfen fl-arena tas-sensi tiegħi, u qed inħoss li dan ħa jkun lejl twil. Dawk l-iljieli twal, meta jidhirli li l-fridge tkun qed tagħmel ħoss iktar mis-soltu. Meta ċerta sensittivita' akuta taħkimni u ma tħallinix norqod għax l-iċken ħoss jibda jidwi b'mod persistenti f'widnejja. Meta l-inħir taċ-ċetaċeju jilħaqni, u jiġini l-aptit li nimprovizza bbq bil-kuntrabaxx tiegħu. Meta, kull ħsieb parassita jagħmel assedju fuq moħħi u ma nafx il-għala il-mistoqsijiet eżistenzjali kollha jibdew iħokku ma xulxin u ansjeta' kbira taħkimni....

Ġulepp mużikali

2005-06-02T11:48:00.000+02:00

Jiġu ħinijiet meta jkolli għatx kbir għal mużika li għaxar snin ilu kont nikkwalifikha bħala 'corny'. Forsi qed nixjieh u widnejja qiegħda ssir iktar demokratika. Jew saret inqas tissaporti dawk is-siegħat ta' agressjoni sonika li kienet iġġarrab xi snin ilu taħt forma ta' solo ta' xi Albert Ayler. Indunajt dalgħodu, hekk kif dħalt fis-sit ta' Marisa Monte (li hija waħda mill-isbaħ vuċijiet fuq il-pjaneta, imma li għandha tendenzi, bħal ħafna brażiljani, li tkun inkonsistenti f'dik li hija 'taste'. "Fautes de gout", ipoġġuha b'mod ħelu l-Franċiżi. Li wara kollox hija ħaġa suġġettiva ħafna....). Insomma, il-biċċa ġulepp mużikali li tilqgħak fl-introduzzjoni tas-sit spiċċajt smajtha xi sitt darbiet. Il-vantaġġ tal-mużika brażiljana għalija hu, ovvjament, li ma nifhimx saħta portugiż, u naf li għandi ħafna inqas toleranza għall-kliem "corny" ta' kanzunetta milli għall-mużika. U l-portugiż Brażiljan jinstema' tant sabiħ.....Xi ħadd bħal Joao Bosco (kantant kompożitur kitarrist kbir brażiljan) ukoll għandu mumenti fil-karriera tiegħu meta tħoss li ċertu kanzunetti setgħu faċilment ikunu fdalijiet minn xi San Remo tas-snin tmenin.
Ikolli ngħid li jibqagħli ċertu livell ta' intoleranza lejn ħafna mill-ħsejjes tas-snin tmenin li bħala valur estetiku npoġġihom fuq l-istess pedestall tal-jeans 'moonwashed' u l-hairstyles abominevoli ta' dak iż-żmien ("ta' footballer ġermaniż", jirreferu għalihom hawnhekk). (Nistghu ninkludu wkoll il-ġlekk bil-'paddings' fl-ispallejn f'din il-kategorija).
Madankollu Joao Bosco u t-'taste' erratika tiegħu xorta jibqgħu jogħġbuni. U nisimgħu daqs kemm nisma' 'l Ornette Coleman u l-Led Zeppelin. Hehe.
Sbieħ wisq il-kuntrasti fil-ħajja.

Picnic

2005-05-29T20:33:00.000+02:00

Ftit ilu għamilt xirja DVDs. Għal dawk l-iljieli meta l-apatija ssammarni mas-siġġu li għandi quddiem it-televixin. (Le, b'xorti ħażina l-mużiċisti ma jaħdmux kuljum).
U billi, kemm jista' jkun, nevita kull forma ta' lobotomija awdjoviżwali, u nirrifjuta li nara t-televixin franċiż u l-ġawhar kollha li jista' joffri ir-'real tv', għamilt ħsieb li nibni librerija ċkejkna ta' films.
U wieħed minn dawk li xtrajt kien il-KBIR 'Mean Streets' ta' Scorsese.
B'DeNiro kif inħobbuh, meta kien għadu sura, u Keitel fl-aqwa tiegħu.
Wara li rajtu bdejt naħseb fuq kif in-New York kif ipinġiha Scorsese u kif ipinġuha filmmakers oħra, kemm ghinet biex ħolqot ċertu mitoloġija f'moħħi ta' din il-belt, li forsi ma tantx għandha x'taqsam mar-realta'.
L-istess kif ir-ritratti ta' Robert Doisneau u films bħal Amelie Poulain għinu biex tinħoloq ċertu xbiegħa ta' Pariġi.
Li jiddispjaċini li ngħidilkom li, LE, l-affarijiet m'humiex hekk, u ghal dawk li jbatu b'nostalġija, ma jiġux 'l hawn. Joqogħdu d-dar jisimgħu Edith Piaf u jaraw Amelie Poulain u jgerrmu l-Camembert u jlegilgu l-Beaujolais...niċċajta niċċajta....

Imma..imma...hemm mumenti fil-ħajja meta din ir-realta' tal-karti postali, dawn is-simulakri, din in-nostalġija tan-nostalġija, jsiru ta' veru, ġo realta' kważi tanġibli.
Il-bieraħ, wara prova, għall-ħabta ta' nżul ix-xemx, kont ma' xi ħbieb, u morna niltaqgħu ma' ħbieb oħra li kienu qegħdin jimprovizzaw picnic ġewwa Champ de Mars, jiġifieri taħt l-Eiffel Tower. U morna bil-karozza ta' sieħbi.
F'dan iż-żmien tas-sena, id-dawl ta' nżul ix-xemx veru jirrifletti b'mod sabiħ fuq il-bini Pariġin.
Ma nafx x'kien, forsi l-mod kif l-Eiffel Tower kien qed jittawwalli b'mod imponenti, il-fatt li kont ili ma narah daqshekk mill-qrib, it-tbissima ta' elf koppja kuntenta taħt sema sajfi, jew it-tliet caipirinha li kont xrobt kwart'ilu, imma dak il-mument ħassejtni VERU qed ngħix Pariġi. Pariġi kif kont ħlomtha fil-ġimgħa qabel ma ġejt hawn l-ewwel darba. Il-Pariġi tax-xbiegħat minn Truffaut, Cartier Bresson, li dak il-ħin iltaqgħu kollha fir-roundabout tas-sensi tiegħi. Mument żgħir ta' ewforija. Luċidita' qawwija.

Hekk kif imxejna lejn Champ de Mars u lmaħna baħar ta' picnics, djembes, kitarri u baguettes, kor fuq ix-xellug tiegħi "knock knock knockin' on heaven's door...." dlonk kissirli u ġabli rmied dak il-mument ta' 'hyper-reality'? x'naqbad ngħidilha?

Insomma llum il-Ħadd. Ġimgħa xogħol quddiemi. Viva d-dvds. Għadni kif rajt The man with the Golden Arm ta' Otto Preminger. Forsi nerġa nara Take the Money and Run ta' Woody Allen. Jew immur indoqq il-kitarra. Naħseb aħjar hekk.

Jetlag

2005-05-26T13:26:00.000+02:00

Bil-mod il-mod qed niġi f'tiegħi wara jetlag vjolenti li kien ta' sabutaġġ fuq ir-ritmi bijoloġiċi ta' ġismi. U issa qed jiġuni xbiegħat tal-Korea li sa jumejn ilu kienu mitlufin f'daħna ta' għajja, nuqqas ta' rqad u ammonti ġenerużi ta' Sojo (ix-xarba nazzjonali Koreana). Is-Sojo, li għandu l-partikularita' li jekk tixrob ħafna minnu, l-għada jkollok ħofor mdaqqsa fil-memorja tiegħek. Huwa prattiku biex tinsa ċ-ċuċati li tkun għidt u għamilt il-lejla ta' qabel. Belt stramba u sabiħa, Seoul. Urbaniżmu stramb, fis-sens li ma taqbadx art fejn hu l-bidu, t-tmiem u ċ-ċentru tal-belt. Taħlita ta' oċċidentaliżmu sfrenat, tradizzjoni, ħafna neon, ħafna nies, ħafna neon, ħafna nies. U meta ssir taf li ftit kilometri 'l bogħod fil-Korea ta' Fuq, hemm miġnun perikuluż, b'livell ta' ġenn kważi surrejali, ma tantx tħossok komdu.
Imma ghall-grazzja t'Alla hemm il-GIs amerikani jieħdu ħsiebna. Hehe. Li ma tantx huma maħbubin mill-Koreani mill jidher. U li tispjega l-fatt għala f'ċertu nightclubs ma ħallewnix nidħol. "Korean membership only". Staqsejt lili nnifsi, possibli dawn in-nies tant twajba għandhom tendenzi razzisti? Jew qed tbeżżagħhom id-daqna tiegħi? Imma milli jidher veru jqażżu l-ustja dawn il-GIs. Il-barracks tagħhom jinstabu fil-parti storika ta' Seoul u milli jidher għamlu erba' ċuċati li ma tantx jistghu jiftaħru bihom.

Imma jien nistaqsikom: jien għandi wiċċ ta' GI Amerikan?

Tgergir

2005-05-25T01:10:00.000+02:00

Lura fuq il-bloggosfera wara 4 t'ijiem Seoul.
Jetlag ikrah, ngħas kattiv, bagalja mitlufa.
Iktar ma nkun 'l bogħod minn art twelidi, iktar l-kriżi t'identita' timmanifesta ruħha ġo fija.
Niftakar li qabel ma tlaqt minn Malta, jien kont ingerger ħafna. Tgergir, fuq id-deżert kulturali ta' pajjiżi, fuq ir-riformi li xtaqt nagħmel fl-edukazzjoni li kieku l-affarijiet kienu f'idejja. Tgergir, fuq il-marda tal-Eurovision u fuq kemm nixtieq li l-poplu Malti jkollu iktar luċidita' u jqum fuq tiegħu.
Mhux li llum waqaft ingerger.
Mhux li llum m'għandix fuqhiex.
Imma meta ġejt hawnhekk ġieli kont insib ruħi ġo sitwazzjonijiet fejn kont inkun imdawwar b'ħafna nies minn pajjiżi differenti. U f'kuntesti bħal dawn, kont ninnota l-integrita' u s-sens ta' identita' ta' kull barrani u nqabbilhom ma' tiegħi.
U ndunajt li forsi kont ingerger wisq u forsi kont inmaqdar wisq 'l art twelidi.
U minn hemm bdejt nipprova nibni sens identita' b'saħħtu, biex speċi ta', iva, jien ukoll għandi biex niftaħar bil-pajjiż tiegħi. U waqaft ingerger u minflok, bdejt infittex. Infittex għal kull ħaġa li stajt inkun kburi biha bħala Malti.
Meta bdejt niżen l-affarijiet, indunajt li kien hemm iktar affarijiet li jdejquni milli li jogħġbuni. U kien jaqbadni d-dwejjaq.
Imma għidt lili nnifsi, id-dwejjaq ifisser li lil Malta nħobbha u nixtieqha tinbidel, għall-aħjar.
Il-mistoqsija li bdiet tittantani wara kienet, jekk jien iniex qed nagħmel xi ħaġa biex inbiddel 'l Malta.
Ma tantx. Fil-fatt tlaqt 'l hemm.

Illum sirt ngħid lili nnifsi, b'ton ottimist, li xi darba ġo Malta għad ikun hawn rinaxximent ta' identita' kulturali. Xi żmien għad toħroġ.
Xi mumenti oħra ngħid lili nnifsi li forsi, DIN hija l-identita' kulturali tagħna u qatt m'hi ħa tinbidel. Speċi ta' kawlata anglosassomediterranja b'togħma ta' dak kollu li setgħet tobżoq fuqna l-kultura MTV. Tinkludi wkoll il-Eurovision.
Jew forsi, le, dawn huma affarijiet efemeri. Fenomeni tal-moda. U taħt, x'imkien, hemm identita' Maltija tbaqbaq, u qiegħda tgħajjat biex toħroġ.
Nixtieq nemmen b'dan il-mod.
Għalkemm niddubita kemm il-Eurovision hija ħaġa efemera f'pajjiżna.
U xi kultant, ingerger.

Julian Manduca

2005-05-19T02:52:00.000+02:00

Ghadni kif sirt naf bil-mewt ta' Julian Manduca. Iċ-Chubby.
Iddispjaċieni ħafna.
Niftakru minn żmien l-universita'.
Kont ili ma narah.
Biss niftakar li kien xi ħadd li dejjem xtaq ibiddel l-affarijiet. Għall-aħjar.
Kien xi ħadd b'inizjattiva kbira.
Niftakru il-'film club' is-Sibt filgħaxija tal-Qroqq.

Jistrieh fil-paċi.

Iż-żaqq

2005-05-18T20:50:00.000+02:00

Mod gużtuż biex ma nħossnix ħażin dwar in-nuqqas ta' proporzjon li hemm bejn żaqqi u l- bqija ta' ġismi, hu li ngħid li jien Epikurjan. "Bon vivant" ngħidulu hawnhekk.
Iż-żaqq. Li minhabba fiha, kull filgħodu nghaddi minn quddiem il-mera miexi "la ġenbha" biex nevita li nara l-profil. Li tinstalla ruħha nkiss inkiss bħal tumur għażżien u tfakkrek li la darba tagħlaq it-tletin ħa tibqa' hemm sat-tmiem, qisha tifkira ta' l-abbuż kollu li ġarrbet is-sistema. Iż-żaqq, li xi kultant tant tkun preżenti li nkun ħa nitlobha ttini xi ħaġa ghall-kera tal-flat. Entita' separata li kelli nidra naċċetta, b'xi bikja 'l hawn u 'l hemm. Xi kultant ikollna xi ngħidu bl-ikrah jien u żaqqi, bħall-miżżewġin, imma ma ndumux ma nagħmlu paċi.
U ngħid li jien Epikurjan.
Biex inpoġġiha fi kliem ieħor, "Epikurjan", fil-każ tiegħi, hija ewfemiżmu ghal "oħxon".
Imma, emmnuni, veru nħobb l-ikel. Inħobb il-festini, inħobb insajjar, inħobb 'La Grande Bouffe', inħobb l-abbundanza.
Meta nkun f'pajjiż barrani l-ewwel ħaġa li nagħmel nfittex restaurants tajbin.
Turiżmu gastronomiku.

Ftit ilu mort indoqq l-Italja.
Iktar kaloriji milli noti.
Jiena nivvenera l-kċina Taljana b'devozzjoni għamja.
F'temp ta' gimgħa fqajt il-fwied bħal wiżż tal-'foie gras'.
Culatello, coppa, grappa, vin santo, parmiggiano, lardo u ħniżrijiet varji oħra.
Waħda mill-waqfiet tagħna kienet ġo Bologna, fejn daqqejna fil-mitiku Chet Baker jazz club.
Bologna, li hija t-tieni l-iktar belt Taljana li nħobb, wara Ruma.

U bħala umaġġ lil żaqqi, lil Bologna u lill-wikkiela kollha Maltin u Għawdxin:
Ir-riċetta DEFINITTIVA tar-ragu' (magħruf bħala bolognese barra mill-Italja).

Ġo kazzola daqxejn kbira, fuq nar baxx, aqli ftit panċetta ġo ftit żejt.
Hekk kif jinħall ix-xaħam, itfa' karotta mqatta', nofs basla mqatta' u zokk ta' karfusa (karfus minn dak l-oħxon, "ta' barra") mqatta' ġol-kazzola.
Ħallat, bi grazzja.
X'ħin jirtab kollox, itfa' nofs kilo kapuljat taċ-ċanga.
Ħallat.
Meta kollox jibda jkanġi fil-kannella, itfa' nofs tazza inbid aħmar.
Ħu pjaċir bir-riħa.
Hekk kif jevapora u jifdal ftit likwidu, ibda żid il-brodu (u 'k'jista' jkun, brodu ta' veru mhux brodu tal-kjub). Żid ukoll ftit kunserva maħlula fil-brodu. Jekk trid tista' żżid it-tadam ( tinsiex tqaxxru u tneħħi ta' ġewwa).
Ħalli kollox itektek madwar saghtejn.
Ħu pjacir bir-riħa.
Bżar u melħ.
Ristorante Diana ġo Bologna fejn tiekol l-aħjar ragu fid-dinja.

Il-Ħadd 15 ta' Mejju...

2005-05-15T22:58:00.000+02:00

Meta kont ghamilt ħsieb li nħalli l-blata warajja u mmur nimraħ fuq il-kontinent, fil-bidu dehret veru iebsa. Jien li tlajt f'ambjent pjuttost borgiż, u l-kumdita' qatt ma kienet problema, jien li l-ikbar dilemma f'hajti kienet fejn ħa mmur u kif ha nieħu pjaċir s-sibt filghaxija (b'mod li l-għada filgħodu ma nispiċċax nerga' naħlef li daqshekk ersaqt lejn Paceville) u kif ħa ntaffi l-ħruq fl-istonku wara l-pastizzi tas-Serkin fil-ħamsa ta' filghodu....Insomma, bhall-biċċa l-kbira ta' żagħżagħ tal-ġenerazzjoni tiegħi kont qed ngħix ġo benniena ta' fsied.
U kelli viżżjoni tal-ġungla urbana barranija pjuttost tal-biża.

Imma b'xorti hazina l-ħajja ta jażżist Malti ma testendix 'l hinn minn tieġ, hotel u restaurant.
U wara perjodu "ndoqq għan-nies" u nakkumula frustrazzjonijiet ġenerali, iddeċidejt li nitlaq 'l hemm.
Ħajja sedentarja ma tantx kienet tghodd għalija.

Seba' snin u għoxrin kilo wara ninstab Pariġi.
Li kieku llum kelli mmur x'imkien ieħor, nerġa' nibda mill-ġdid, naghmilha mingħajr problemi. Illum tidher inqas iebsa.
La darba tlaqt minn Malta spiċċajt nirrelativizza kollox.
Li rrid ngħid hu li l-insularita' ta' Malta ma tħalliniex naraw l-affarijiet kif veru huma. (U l-passat kolonjali forsi ma tantx jgħin lanqas). Ghandna tendenza kerha li dak kollu li huwa barrani narawh aħjar u isbaħ.
Tmur ġo villaġġ ġo kwalunkwe' pajjiż ewropew hemm ċans issib l-istess mentalita'. Per eżempju il-mod kif in-nies li jghixu 200km 'l boghod minn Pariġi jħarsu lejn Pariġi huwa simili ħafna ghal mod kif il-Maltin iharsu lejn "ta' barra".
U kullimkien hemm ċans issib faqar kulturali, nies jgħidu l-istess ċuċati, u nies li jħarsu lejk b'mod stramb u b'nuqqas ta' fiduċja meta tghidilhom li int mużiċist.
Kollox relattiv.

Kwart'ilu kont fuq is-site ta' David Binney (mużiċist li nammira ħafna) u kien qed jgħid xi jhoss meta jkun on tour ġewwa l-Istati Uniti barra minn New York. U kemm hi 'culture shock' għalih meta joħroġ minn New York.
Isimghuh dan. Kbir.

P.S.Qed ninduna bit-ton serju ta' dan il-blog. Probabbli biex nikkompensa ghall-vojt ta' dan il-Ħadd 15 ta' Mejju. Dhalt id-dar fis-7 ta' filghodu qomt fis-siegha w nofs. Papra m'ghand Chartier u flixkun Badoit. Lura fis-sodda biex insaffi l-fwied. Nqum fis-7 u nofs ta' filghaxija u ninduna li hlejt gurnata.

New York

2005-05-13T02:57:00.000+02:00

Qatt m'għandek tafda l-oġġettivita' tat-turist.
Ta' spiss it-turist jara kollox sabiħ.
"Ta' barra mod ieħor. Hawnhekk ghaks." ihobb jghid il-Malti.
U ftit ilu kont New York.
New York, u l-mitoloġiji kollha li ġġorr magħha din il-belt, wara adoloxxenza mimlija Scorseses, De Palmas, Paul Austers u Andy Warhols.

B'dan il-kliem nixtieq nistedinkom biex ma temmnux dak kollox li ħa ngħid hawn taħt.

L-isbaħ/l-aħjar għaxar affarijiet fi New York:

1. Alphabet City. Avenues A,B,C fl-East Village. Għalkemm dawn l-inħawi qeghdin jiġu nfettati mill-BoBos (Bourgeois Bohemes bil-Franċiż) u suġġetti ghal 'gentrification' intensa li qed taħkem ukoll postijiet bħal Harlem, għad fadal daqxejn ħmieġ urban u 'edge' Njujorkiża. Hemmhekk insibu THE STONE (Avenue C, 2nd Street) ex-restaurant ċiniż li gie mibdul ġo speċi ta' loft-ċentru ta' mużika 'downtown', esperimentali, mingħajr pretensjoni - John Zorn huwa l-mexxej spiritwali. TONIC jinsab ftit il-boghod, Delancey Street (hemmhekk inxaqilbu Lower East Side).

2. Squirells ġo Central Park. Hemm ĦAFNA u veru ħelwin.

3. 55bar Christopher Street, Greenwich Village. Bar ħelu fejn tista' tixrob litri ta' Brooklyn lager u tisma' mużika tajba.

4. Brooklyn lager.

5. Il-Chrysler building, jidher minn kullimkien, jidher sabiħ minn kullimkien.

6. Belmont, jew Little Italy in the Bronx, fil-Bronx. Parmiġġan, clams, prosciutto, iktar pwerto-rikani milli Taljani, u xi restaurants fejn ir-ruħ romantika nostalġika ta' ċinefila tista' toħlom xeni minn films dwar il-Mafia.

7. Harlem u d-djar li hemm fuq Malcolm X Boulevard (ex-Lenox Ave.)

8. Il-MoMa. Ghalkemm il-ħabib tieghi franċiż anti-kapitalist anti-mondjalist xellugi b'intensita' kwazi irritanti, pprova jikkonvinċini biex ma mmurx, billi jitfagħli mewġa argumenti kontra l-mod kif il-Muzew ta' l-Arti Moderna huwa 'rip-off' ghax 20 dollar u l-mużewijiet fl-Ewropa issa kollha qed jogħlew minħabba fih, u kif il-Muzew huwa organizzat madwar 2 caffeterias, jiena xorta mort. U ħadt pjaċir.

9. Brooklyn ma tantx żorniha sew. Ma morniex 'l hemm minn Brooklyn Heights u Park Slope. Biss bqajt b'toghma qarsa wara Tex-Mex vjolenti li probabbli ghamilli hsara permanenti fill-fwied. Ammonti kbar ta' żejt tant li meta tispicca tiekol tkun trid tmur tinhasel. Ta' min isemmi l-Brooklyn Museum ukoll fejn kien hemm exhibition veru tajba ta' Basquiat.

10. 'Stand clear of the closing doors please' - dik il-vuċi tal-bellus li tisma' fl-undergorund njujorkiż.

Il-ġimgħa d-dieħla ħa nkun Seoul. Sejjer indoqq mal-Youn Sun Nah 5.
Il-pjanist li jdoqq maghhom issoltu ma jistghax.
Ma ngergirx.
Milli jidher jieklu l-klieb hemm.
Narakom.

Id-denfil

2005-05-10T23:09:00.000+02:00

Tiftakruh id-denfil? Dak il-ktejjeb bil-qoxra hamra u hadra li żammilna kumpanija matul tfulitna? Mimli stejjer?

Illum iddeċidejt li ma nkellimkomx fuqu.

Imma ħa nkellimkom fuq denfil iehor.
Jiena ngħix ma muziċist iehor hawnhekk Parigi, is-sur Degabriele.
Magħruf bhala id-D mal-hbieb.
Magħruf bhala Golfinho ma' settur iehor ta' ħbieb.
'Golfinho' tfisser denfil bil-portugiz. (Tispelliha 'gowfienju' u ġġebbed kemmxejn is-sillaba tan-nofs biex tinstema' qishek brażiljan)
Ma niftakarx ezatt l-oriġini ta dan il-laqam. Imma naħseb li s-sajf li għadda meta jiena kont nghix mad-d u mikiel, l-Isla, xi Ħadd filgħodu, bejn ugiegħ ta' ras u Sunday Times u fdalijiet tal-bbq tal-lejla ta' qabel, kelli viżżjoni 'Zoomorfika' fejn rajt lid-d jinbidel ġo denfil. M'iniex ha noqgħod nidħol fid-dettalji ta' minn fejn jiġu dawn il-viżżjonijiet. Intom kbar biżżejjed.

Illum nixtieq nagħmel ummaġġ lid-denfil.
Id-denfil li hajjarni nagħmel blogg.
Id-denfil li tant jiehu paċenzja bija f'mumenti ta' krizi (nisa, fridge vojt, karriera etc)

U biex nirringrazzjah ħa nibda ninkludi kolonna żghira fil-blogg tieghi li ha nsemmiha:

ANEDDOTI (jew misfatti) MHUX DAQSHEKK INTERESSANTI MIL-ĦAJJA DOMESTIKA TA' ĊETAĊEJU (barra mill-ilma):

ANEDDOTU Nru.1
Billi m'ghandniex washing machine fil-flat ikollna mmorru il-laundry (il-londri).
Ftakru li ninstabu barra minn Malta.
Hawnhekk il-flatsijiet zghar. U ta' barra mod iehor...
U darba id-d aka golfinho, mar jahsel il-hwejjeg u jnixxifhom.
U tefa' quilt god-dryer mal-hwejjeg tieghi.
Il-quilt inhallet.
U l-hwejjeg tieghi spiccaw qishom pittura ta' Pollock.
Ghadhom hekk sa llum.

Kien il-bidu tal-hajja tad-d aka golfinho barra mil-maxtura ta' Malta.
Jigifieri nizkuzawh.

Narakom.
Id-darba li jmiss inkellimkom fuq New York u l-Korea.

TWELID

2005-05-09T11:41:00.000+02:00

Xi mistoqsijiet bdew jittantawni meta ddecidejt li nibda dan il-blog:

1. Dan mhux ħala ta' zmien?
Ftakru li jien ninstab barra minn Malta. U ta' barra mod iehor...
Hawnhekk il-ħajja mgħaġġla. U m'hawnx ħala ta' ħin. Ħajja wisq mgħaġġla...
Staqsu 'l dawk li kienu l-Awstralja.
Jew dawk li kienu l-Kanada.

2. Jien naf nikteb bil-Malti?
Probabbli ma tantx.
Skużawni ta' kull żball ta' natura ortografika jew grammatika.
U bhal ma forsi ndunajtu bħalissa ghandi 'self-consciousness' kbira bil-'ħ', 'ġ', 'ż', 'ċ' u 'għ', li tant jien kburi bihom. U qed nagħmel sforz KBIR biex nużhom. U probabbli daqt taqbiżli.

3. Hemm ċans kbir li bħal ma bdejt ħafna affarijiet f'ħajti u ma komplejthomx, tiġri l-istess ħaġa b'dan il-blog.
Fost l-affarijiet li bdejt u ma komplejtx kien hemm l-ornitoloġija (kont inrabbi s-summien meta kont zghir, u ż-żebri wkoll), hafna dieti differenti, kull forma ta' attivita' fizika jew sportiva, l-istudji ta' l-inġinerija (hekk tinkiteb?), ħafna kotba (fosthom V ta' Pynchon, ppruvajt darbtejn, ma rnexxilix, A Brief History Of Time ta' Hawking, u l-User Manual tal-Mac li ghadni kif xtrajt, insomma dak ma' jghoddx...).

4. Min jimpurtah mill-blog ta' Sandro Zerafa?

Għidt lili nnifsi li blog jista' jkun terapewtiku.
Blog jista' jgħini f'dawk il-mumenti ta' nuqqas ta' spirazzjoni, meta ma jkollix aptit nistudja l-kitarra.
(Għalkemm ilhom jghiduli ghoxrin sena li biex nistudja l-kitarra m'hemmx bzonn ispirazzjoni. Dixxiplina biżżejjed).
Blog jista' jgħini biex nirrikonċilja ruhi mall-lingwa maltija.
Blog HEMM ĊANS li jgħini f'dawk il-mumenti ta' nhar it-tlieta filgħaxija meta niġi lura mill-konservatorju ta' Pontault Combault (tispelliha Ponto' Kombo'), belt fis-suburbs ta' Pariġi (mhux is-suburbs ta' La Haine ta' Kassovitz, le, dawk hafna iktar interessanti), probabbli l-iktar suburb boring ta' Parigi, fejn il-livell ta' attivita' huwa komparabbli ma' dak tan-Nadur il-Hadd wara nofs in-nhar f'Awissu. Qisha pittura ta' Edward Hopper mingħajr il-valur estetiku.
Kull nhar ta' tlieta jiena ngħallem il-kitarra fil-konservatorju ta' Pontault Combault.
U din il-belt tispira go fija VOJT kbir.
Nkellimkom iktar tard dwar Ponto' Kombo' u l-effett soporifiku ta' din il-belt.

Imma issa ħa jkolli mmur.
Ghax sar il-ħin.
U l-ħajja hawnhekk mgħaġġla....
Ta' barra....